नेपाली र चिनिया जनताबीचको सम्बन्ध अझ प्रगाढ बन्नेछ
मंसिर २६, २०८०, मङ्गलबार | दिउँसो १२:२२ बजे | 40
सुनिल प्रजापति, प्रमुख भक्तपुर नगरपालिका
भक्तपुर नगरपालिकाको निमन्त्रणामा आउनुभएका मित्र देश जनवादी गणतन्त्र चीनको स्—छुवान प्रान्तको लशान नगरपालिकाका उपप्रमुख लेइ चियनसिनज्यू, टोलीमा सहभागी सम्पूर्ण प्रतिनिधिमण्डलका सदस्यज्यूहरू र यस समारोहमा उपस्थित जनप्रतिनिधिहरु तथा आदरणीय व्यक्तित्वहरुलाई भक्तपुर नगरपालिकाको तर्फबाट हार्दिक स्वागत गर्दछौं ।
देशको सानो नगरमध्ये एक भक्तपुर नगरपालिका नेपालको राजधानी काठमाडौंबाट १३ कि.मी. पूर्वमा अवस्थित छ । सांस्कृतिक, पुरातात्विक र ऐतिहासिक दृष्टिले यो अत्यन्त महत्वपूर्ण नगर हो । आठौं शताब्दीमा स्थापित यो नगर १२ औंदेखि १५ औं शताब्दीसम्म राजधानी नगरको रुपमा रहेको र १८ औं शताब्दीसम्म स्वतन्त्र राज्यको रुपमा रहेको थियो ।
भक्तपुरको दरवार क्षेत्र, टौमढी क्षेत्र र दतात्रय क्षेत्र पर्यटकीय दृष्टिले महत्वपूर्ण क्षेत्रहरु हुन् । दरवार क्षेत्रमा अवस्थित ५५ झ्याल दरवार र सुनढोका, टौमढी टोलमा रहेको नेपालकै अग्लो पाँच तल्ले मन्दिर (ङातापोल्हँ) र दतात्रयमा अवस्थित मयुर झ्याल वास्तुकलाको दृष्टिले अनुपम उदाहरणहरु हुन् । समय समयमा हुने जात्रा, पर्व, नाचगानजस्ता अमूर्त सम्पदाहरु र विश्व प्रख्यात सम्पदाहरुकै आधारमा सन् १९७९ मा युनेस्कोले ती क्षेत्रहरुलाई विश्व सम्पदा सूचिमा सुचिकृत गरेको थियो । ती क्षेत्रहरुको अवलोकन भ्रमणको लागि हरेक वर्ष संसारका विभिन्न देशबाट लाखौं पर्यटकहरु आउने गर्छन् । भक्तपुर भ्रमण गर्ने पर्यटकहरुबाट केही शुल्क उठाई त्यस रकमबाट भक्तपुरको मूर्त र अमूर्त सम्पदाहरूको संरक्षण, शिक्षा, स्वास्थ्य, सरसफाइ, खेलकूदलगायतका क्षेत्रमा खर्च गर्दै आएका छौं ।
राजनैतिक रुपमा यो नगर १० वटा वडामा विभाजित छ । ९० प्रतिशतभन्दा बढी नेवार जाति रहेको यो नगरमा बि.सं. २०७८ को जनगणनाअनुसार ७८,८५४ जना स्थायी बसोबास गर्ने जनसंख्या रहेको तथ्यांक छ । कृषि यहाँका मानिसहरूको मुख्य पेशा रहेको र घरेलु तथा साना उद्योग, व्यापार व्यवसाय, पर्यटन, हस्तकला आदि याहाँका नागरिकहरुका रोजगारीका क्षेत्रहरू हुन् ।
नगरसभा नगरपालिकाको उच्च निकाय हो । कानुनी व्यवस्थाअनुसार प्रमुख, उपप्रमुख सहित वडा वडाबाट निर्वाचित जनप्रतिनिधिहरू नगरसभाका सदस्य रहनेछन् । नगर सभाले नगरको आवश्यकताअनुसार ऐन, नियम, विनियमहरू बनाउँछ । जनताको हितमा कानुनहरु निर्माण गरी हामीले कार्यान्वयन गर्दै आएका छौं ।
२०७२ सालमा संघीय लोकतान्त्रिक गणतन्त्रात्मक संविधान निर्माणपछि दुईवटा स्थानीय तहको निर्वाचनहरू सम्पन्न भए । ती दुबै निर्वाचनहरुमा यस नगरपालिकाका सम्पूर्ण वडाहरूमा नेपाल मजदुर किसान पार्टीका जनप्रतिनिधिहरू निर्वाचित भए । नेपाल मजदुर किसान पार्टी वैज्ञानिक समाजवादलाई विश्वास गर्ने कम्युनिष्ट पार्टी हो । माक्र्सवाद, लेनिनवाद र माओत्सेतुङ विचारधारालाई मार्ग निर्देशक सिद्धान्तको रुपमा अङ्गिकार गर्दै आएको यो पार्टीले निर्वाचनलाई पनि जनताको हितमा उपयोग गर्दै आएको छ । नेपाल मजदुर किसान पार्टीको नेतृत्व नेपालका वरिष्ठ राजनीतिज्ञ का. नारायणमान बिजुक्छेँ (रोहित)ले गर्दै आउनुभएको छ ।
उहाँले आजभन्दा दुइ दशक अगाडि भक्तपुरको भविष्यको कल्पना गर्नुहुँदै ‘सय वर्षपछिको भक्तपुर’ नामको पुस्तक प्रकाशित गर्नुभयो । त्यो पुस्तक नै भक्तपुर नगरपालिकाको अहिले काम गर्ने मार्गचित्र बनेको छ । हामी पार्टीको नीति र निर्देशनमा रहेर भक्तपुरको विकासको निम्ति जनताको सेवामा समर्पित भएर काम गर्दैछौं । भक्तपुरलाई ज्ञानविज्ञानको केन्द्र, पर्यटकीय गन्तव्यस्थल, सांस्कृतिक नगर बनाउने हाम्रो उद्देश्य हो ।
यस नगरमा चिनियाँ कम्युनिष्ट पार्टीका नेता तथा सरकारका उच्चपदस्थ पदाधिकारीहरुले बराबर भ्रमण गर्नु भएको छ । २०८० जेठ १७ गते जनवादी गणतन्त्र चीनको स्—छुवान प्रान्तका पार्टी सचिव वाङ स्याओहुईले, २०८० साउन ८ गते चिनियाँ कम्युनिष्ट पार्टीका पोलिटब्युरो सदस्य तथा छोङछिङ नगरपालिकाको पार्टी समितिका सचिव युआन चियाच्युनले र २०८० कार्तिक २६ गते चीनको सिन्चाङ(तिब्बत) स्वायत्त क्षेत्रका चिनियाँ कम्युनिष्ट पार्टीका सचिव वाङ च्युङचङले नेपाल मजदुर किसान पार्टीका आदरणीय नेता नारायणमान बिजुक्छेँ (रोहित) सित भेटघाट गरी दुई देश र दुई पार्टीबीच सम्बन्ध विस्तारका बारेमा छलफल गर्नुभएको थियो । त्यसैगरी २०८० असार १४ गते जनवादी गणतन्त्र चीनको सान्तोङ प्रान्तको हुआन थाई नगरपालिकाका प्रतिनिधिमण्डललगायतले भक्तपुरको अवलोकन भ्रमण गर्नु भएको थियो भने २०८० मंसिर ३ गते चिङकाङशान नगरपालिकाका उप प्रमुख ह्वामिङले पनि यस नगरपालिकाको भ्रमण गर्नु भएको थियो । त्यस क्रममा भएको भेटघाटमा दुइ नगरपालिकाबीच सम्बन्ध बिस्तार र आपसी अनुभव आदानप्रदान गरी अगाडि बढ्नेबारे सकारात्मक छलफल भएको थियो । आज हामी लसान नगरपालिकाका उप प्रमुखज्यूको नेतुत्वमा आएको प्रतिनिधिमण्डलाई स्वागत गर्दैछौं । समय समयमा हुने चिनियाँ उच्चस्तरीय प्रतिनिधि मण्डललाई हामीले यस नगरमा स्वागत गर्न पाउँदा हामी अत्यन्त खुशी छौं । यस्ता अवसरहरु फेरि फेरि पनि पाइरहने आशा गर्छौ ।
कोभिड १९ ले विश्व आक्रान्त भएको बेला चिनियाँ सरकारले त्यसको विरुद्ध खोपको उत्पादन गरी विश्वका जनतासँगै नेपाली जनतालाई पनि सहयोग गरेको थियो । त्यो गुणलाई नेपाली जनताले कहिल्यै बिर्सने छैनन् । त्यस संकटको घडीमा भक्तपुर नगरपालिकाको भगिनी सम्बन्ध रहेको चीनको तिब्बत स्वशासित क्षेत्रस्थित सान्नान नगरपालिकाले भक्तपुर नगरपालिकाद्वारा संचालित ख्वप अस्पताललाई विभिन्न स्वास्थ्य उपकरणहरू उपलब्ध गराएर सहयोग गरेको थियो । हामी यसै कार्यक्रममार्फत पनि उहाँहरुलाई हार्दिक धन्यवाद दिन चाहन्छौं ।
चिनियाँ कम्युनिष्ट पार्टीको तर्फबाट नेपाल मजदुर किसान पार्टीलाई त्यतिबेला स्वास्थ्य सामग्रीहरु उपलब्ध गराएको थियो । नेपाल मजदुर किसान पार्टीलाई प्राप्त ती स्वास्थ्य सामग्रीहरु पार्टी सचिव एवं साँसद प्रेम सुवाल स्वयम् ख्वप अस्पताललगायत देशका विभिन्न अस्पतालहरुमा पुगेर वितरण गर्नुभएको पनि यो अवसरमा जानकारी गराउन चाहन्छौं ।
भक्तपुर नगरपालिकाले शिक्षामा वडा वडामा शिशुस्याहार तथा बालविकास केन्द्रहरू संचालन गर्दै आएको छ । यस नगरमा ९२ वटा विद्यालयहरु छन् । नगरपालिकाले उच्च शिक्षा प्रदान गर्न २ वटा इन्जिनियरिङ कलेजहरुसहित ८ वटा शैक्षिक संस्थाहरु संचालन गर्दै आएको छ । ती शिक्षण संस्थाहरुमा देशका ७७ वटै जिल्लाका विद्यार्थीहरु अध्ययन गरिरहेका छन् । शिशुस्याहार केन्द्रदेखि उच्च शिक्षा प्रदान गर्ने कलेजहरु संचालन गर्ने भक्तपुर नेपालकोे एक मात्र नगरपालिका हो । हामीले ख्वप विश्वविद्यालय सञ्चालन गर्ने तयारी पनि गरिरहेका छौं ।
घरदैलो नर्सिङ, वडा वडामा स्वास्थ्य उपचार केन्द्र र १०० शैय्याको आफ्नै स्वामित्वमा ख्वप अस्पताल तथा श्वासप्रश्वास केन्द्र सञ्चालन गरी कम शुल्कमा गुणस्तरीय स्वास्थ्य सेवा प्रदान गर्दै आएका छौं भने नगरपालिकाकै व्यवस्थापनमा संचालित ख्वप तिलगंगा आँखा अस्पताल र नागरिक आरोग्य केन्द्रले पनि जनतालाई स्वास्थ्य सेवा प्रदान गरिरहेका छन् । भक्तपुर अस्पताल, भक्तपुर क्यान्सर अस्पताल र शहीद धर्मभक्त अंग प्रत्यारोपण केन्द्र समेत गरी यस नगरमा ४ वटा सरकारी अस्पतालहरु संचालनमा छन् ।
यहाँका सम्पदाहरूको संरक्षण गरी पर्यटन उद्योग विकास गर्नेतर्फ हामीले ध्यान दिइरहेका छौं । २०७२ सालको भूकम्पले यहाँका धेरै घरहरू भत्केसँगै सयौं सम्पदाहरू क्षतिग्रष्त भए । नगरपालिकाले तीमध्ये धेरै सम्पदाको पुनःनिर्माण र जीर्णोद्धार सम्पन्न गर्यो । आत्मनिर्भरतालाई जोड दिंदै यस नगरपालिकाले स्थानीय सीप र प्रविधिको प्रयोग गरी मौलिक शैलीमा सम्पदाहरु संरक्षणमा जोड दिईआएको छ । अझै केही सम्पदाहरूको पुनःनिर्माण र जीर्णोद्धार कार्य जारी छन् ।
नेपालको जीवित संग्रहालयको रुपमा रहेको यस नगरलाई अझ समृद्ध बनाई देशको उत्कृष्ट नगरपालिका बनाउन हामी कार्यरत छौं ।
नेपालको भक्तपुर नगरपालिका र चीनको स्—छुवान प्रान्तको लशान नगरपालिकाबीच मैत्रीपूर्ण सहकार्य र सम्बन्ध स्थापना गरी उपयुक्त समयमा भगिनी सम्बन्ध कायम गर्ने उद्देश्यले आज यो समझदारीपत्रमा हस्ताक्षर गर्दैछांै । आगामी दिनमा यस समझदारी पत्रमा उल्लेख भए बमोजिम दुइ नगरपालिकाबीच समानता र पारस्परिक हितलाई ध्यानमा राखेर अर्थतन्त्र, व्यापार, शिक्षा, स्वास्थ्य, संस्कृति, पर्यटन, हस्तकला, खेलकुदलगायतका क्षेत्रमा सहयोग आदानप्रदान हुने आशा गर्छौ ।
हामी चीनलाई संधै असल मित्रको रुपमा लिन्छौं । नेपाली जनता र चिनिया“ जनताबीचको सम्बन्ध अझ प्रगाढ बन्दै जाने विश्वास व्यक्त गर्दछौं । धन्यवाद !
(संघीय लोकतान्त्रिक गणतन्त्र नेपालको भक्तपुर नगरपालिका र जनवादी गणतन्त्र चीनको स्—छुआन प्रान्तको लशान नगरपालिकाबीच मंगलबार मैत्रीपूर्ण सहकार्य सम्बन्ध स्थापनासम्बन्धी समझदारी पत्रमा हस्ताक्षर समारोहमा भक्तपुर नपाका प्रमुख सुनिल प्रजापतिको मन्तव्य)
फाेटाेमा हेर्नुहाेस्...
Comments
.jpg)
.jpeg)
.jpeg)
