नगरवासीयात कृषिइ आत्मनिर्भर यायेगु कुतः कथं भाजु तरकारी व फलफूल बजाः चाल

यल जिल्लाया महालक्ष्मी नगरपालिकाका वडा ५ या टिकाथलिइ बुद्ध पार्टि पाएलेसय् वनेगु लँय् भाजु तरकारी तथा फलफूल बजारया उलेज्या उगु नगरपालिकाया मेयर हरिगोविन्द श्रेष्ठं यानादीगु दु । महालक्ष्मी नगरपालिका धइगु कृषि उब्जनिया निंतिं नांजागु थाय् खः उकिसनं टिकाथलिला तरकारी खेतिया निंतिं उर्बर भुमि खःधका धयादिसे मूपाहाँ मेयर श्रेष्ठं थ्व नगरपालिकायात कृषिइ आत्मनिर्भर यायेगु निंतिं दुग्यंक कुतः याना च्वनागु खँ कनादिल । मूपाहाँ मेयर श्रेष्ठं थःगु भुमिया कृषि उत्पादन थःगु हे मिइदइ कथं महालक्ष्मी नगरपालिकाया वडा ५ या टिकाथलिइ चायेकुगु भाजु तरकारी तथा फलफूल बजार व्यवस्थित बजाः जुया न्ह्याःवने फयेमा धका भिन्तुना बियादिल । न्हूगु चाःगु उगु बजाःया कजि धन गोविन्द महर्जनया सभानायसुइ जुउगु उगु बजाः उलेज्याझ्वलय् नगरपालिकाया उपमेयर लक्ष्मी महर्जनं थुउगु नगरपालिकाया कृषि उद्यम यात ग्वाहालि याये कथं नगरपालिकाका पाखे अार्थिक अनुदान बिया वया च्वनागु खँ कनादिल । ज्याझ्वलय् उगु बजाःया सल्लाहकार दिपक के सि लगायत नगरपालिकाया झिगुलिं वडाया वडाध्यक्ष पिनिगु नं उपस्थिति दूगु खः । थःगु थासय् थुकथं व्यवस्थित बजाः चायेकुगुलिं अनया कृषि उद्यमीया नापनापं स्थानिय बासिन्दापिन्सं लसता प्वंकुगु दु धका उगु बजाः उलेज्याया संयाेजक सरस्वति महर्जनं जानकारी बियादीगु दु ।