नगेन्द्रराज शर्मा साहित्यिक पत्रकार पुरस्कार नवप्रज्ञापनलाई

जयराम बिडारी

नगेन्द्रराज शर्मा साहित्यिक पत्रकारिता कोष-२०७८, द्वारा यस वर्षको नगेन्द्रराज शर्मा साहित्यिक पत्रकारिता पुरस्कार नवप्रज्ञापन साहित्यिक पत्रिकाका सम्पादक नवराज रिजाललाई अर्पण गरिएको छ । उक्त अवसरमा पुरस्कृत व्यक्तित्व रिजाललाई सम्मान-राशी कोषका कोषाध्यक्ष शङ्कर भारतीले, प्रमाण-पत्र नगेन्द्रराज शर्माले माला तथा रोचक घिमिरेले अर्पण गरेका थिए । कार्यक्रमलाई सम्बोधन गर्दै नगेन्द्रराज शर्माले बितेका दुःखहरू सम्झँदा सुखद अनुभूति हुने भन्दै आफूले अभिव्यक्ति प्रकाशनका क्रममा ४३ रूपैयाँको विज्ञापन ल्याएको स्मरण गरे । उतिखेर कतैबाट उल्लेख्य सहयोग नपाएको गुनासो गर्दै त्यसैलाई सुख सम्झेर आजकल आनन्दित हुने गरेको उनको अभिव्यक्ति थियो । आफू जस्तो सामान्य मान्छेलाई अनेकानेक पुरस्कार, सम्मान र अभिनन्दन अर्पण गरेकामा आफू अत्यन्त कृतकृत्य भएको उनको तर्क थियो । दस रूपैयाँ प्रतिव्यक्तिका दरले वनभोज सम्पन्न हुने रमाइलो अनुभव साझा गर्दै शर्माले उपस्थित सबैप्रति कृतज्ञता ज्ञापन गरे । वरिष्ठ साहित्यिक पत्रकार रोचक घिमिरेले अभिव्यक्ति पत्रिका- वि.सं. - २०२७ देखि प्रकाशित हुँदै आएको अवगत गराउँदै साहित्यिक पत्रकारितालाई तपस्याको संज्ञा दिए । रचनात्मक काममा सरकारले कहिल्यै ध्यान नदिएको भन्दै घिमिरेले सरकारले आसेपासे पोस्ने मात्र गरेको आरोप लगाए । कुनै पनि पुरस्कारलाई अर्थसँग भन्दा पनि व्यक्तिको व्यक्तित्वसँग दाँज्नुपर्ने भन्दै नगेन्द्रराज शर्मा आफैँ एउटा उच्च धरोहर भएको बताए । नेपाल उपन्यास समाजका अध्यक्ष शङ्कर भारतीले नगेन्द्रराज शर्माको जन्मदिनको उपलक्ष्यमा यो पुरस्कार ग्रहण गरिदिएकामा रिजालको मुक्तकण्ठले प्रशंसा गरे । सम्मानित व्यक्तित्व नवराज रिजालले स्नातक उत्तीर्ण गरिसकेपछि आफूले सम्पादन सुरूआत गरेको र आजसम्म नवप्रज्ञापनको १०७ अङ्क प्रकाशित भइसकेको दृष्टान्त पेस गरे । ०५२ सालदेखि बहुभाषामा प्रकाशित गर्दै आएको बताउँदै विभिन्न विषयमा ३० वटा विशेषाङ्क प्रकाशित गरिसकेको उनले अवगत गराए । हालै नेपाल बाहिरका नेपाली भाषीका रचना विशेषाङ्क प्रकाशित गरेको भन्दै यो पुरस्कारले आफ्नो दायित्व थप बढेको पनि उनको कथन थियो । विशेषाङ्क प्रकाशित गर्दै गर्दा नयाँ पुराना दुवैलाई समेट्ने आफ्नो अभीष्ट रहेको पनि उनले उल्लेख गरे । साहित्यकार विधान आचार्यले रिजालको व्यक्तित्व र कृतित्वमाथि प्रकाश पारेका थिए । कार्यक्रमको सुरुमा राप्रउ पोखरेल र द्वारिका ढुङ्गानाको दुखद निधनप्रति शोक व्यक्त गर्न एक मिनेट मौनधारण गरिएको थियो । किशोर पहाडीले सहजीकरण गरेको उक्त कार्यक्रमको अध्यक्ष पवन आलोकले बिट मारेका थिए ।