कबड्डी प्रतियोगिताको उपाधि पनौती नगरपालिकालाई

भक्तपुर
श्रावण ४ चाँगुनारायण नगर खेलकुद विकास समितिको आयोजनामा भएको नगर स्तरीय मैत्रीपूर्ण कबड्डी प्रतियोगिताको उपाधि पनौती नगरपालिकाले जीतेको छ। शुक्रबार चाँगुनारायण नगरपालिका-७ तफाडम्फू स्थित नगरपालिकाको सभा हलमा भएको फाइनल खेलमा बनेपा नगरपालिकालाई ४८- ५६ ले हराउदैं पनौती नगरपालिकाले उपाधि चुमेको हो। विजेता टोलीका खेलाडी मनिस थापा प्रतियोगिताको सर्वोत्कृष्ट खेलकुद घोषित भए। विजयी सम्पूर्ण खेलाडीलाई चाँगुनारायण नगरपालिकाका प्रमुख प्रशासकीय अधिकृत शिव प्रसाद हुमेगाईं, शिक्षा तथा खेलकुद शाखा प्रमुख दिनेश अर्याल, नगर खेलकूद विकास समतिका अध्यक्ष रघु केसी लगायतले पुरस्कृत गरे। प्रमुख प्रशासकीय अधिकृत शिव प्रसाद हुमेगाईंले नगरपालिकामै पहिलो पटक आयोजना भएको नगर स्तरीय मैत्रीपूर्ण कबड्डी प्रतियोगितालाई सभ्य तथा भव्य रुपमा सम्पन्न गर्न सहयोग गर्ने सम्पूर्णमा धन्यवाद ज्ञापन गर्नु भयो।यसैगरी नगर खेलकूद विकास समतिका अध्यक्ष रघु केसीले अब आउने दिनहरुमा अझै धेरै प्रतियोगिता निरन्तर आयोजना हुने जानकारी दिए।