सात विद्यालयको संयुक्त क्याम्प सुरु

निओ फ्युजन ओपन रोभर/रेन्जर क्रयूको आयोजनामा सात विद्यालयको संयुक्त रुपमा नयाँ वर्षको फ्रेनशिप क्याम्प 'गरेर सिक' भन्ने अभिप्रायले दुई रात तीन दिने क्याम्प फैढोका आधारभूत विद्यालयमा संचालन भएको छ। बालबालिका चौतर्फी विकास गर्नुका साथै सामुहिक भावना, सहयोग, सहकार्य, मेलमिलापको माध्यमले प्रकृति र खुल्ला वातावरणले मात्र स्वतन्त्र सिकाई गराउने कुराको जानकारी क्याम्प प्रमुख निरञ्जन बेकोजूले गर्नुभयो। क्याम्पको अनुशासन, जिम्मेवारी, कर्तव्य र नेतृत्व क्षमता विकास हुने भएकोले असल र संस्कार युक्त व्यवहारको विकास गर्न सकिने कुरा रोभर लिडर बालकृष्ण वनमाला बताउनुभयो। जीबन उपयोगी र व्यावहारिक ज्ञान र सीप प्राप्त हुने भएकोले क्याम्पमा सहभागी हुन पाएकोमा महेन्द्र ग्राम माध्यमिक विद्यालयका शुसिला उप्रेतीले खुसी व्यक्त गर्नुभयो। त्यसैगरी आदर्श आजाद माध्यमिक विद्यालयको आभास मण्डनले आफूले नयाँ साथी र नयाँ परिवेशमा नयाँ कुराका साथै साहसिक खेलले जोस जाँगर बढेको बताउनुभयो। बन्द कोठामा मोबाइल र ल्यापटपमा हराएका बालबालिका लाई यसको लतबाट छुट्टयाउन र बालबलिकाहरूको सोच,क्षमता र व्यवहार फरक तरिका बाट प्रस्तुत गर्न क्याम्प महत्त्वपूर्ण भएको कुरा स्काउट मास्टर दिल प्रसाद प्रजापतिले बताउनुभयो। उक्त क्याम्पमा २५ जना स्काउट मास्टर,२५ जना रोभर/रेन्जरहरु र १३१ जना स्काउटरहरुको सहभागिता रहेको छ।