च्याम्हासिंह चोकमा खुल्ला रक्तदान कार्यक्रम सम्पन्न
फाल्गुन १८, २०८०, शुक्रबार | दिउँसो ०१:१० बजे | 70
मनिला प्रजापति
भक्तपुर, फाल्गुण १८
उदय बचत तथा ऋण सहकारी संस्था लि. को २८ औं स्थापना दिवसको उपलक्ष्यमा शुक्रबार भक्तपुरको च्याम्हासिंह चोकमा रक्तदान कार्यक्रम सम्पन्न भएको छ । उदय बचतले प्रत्येक वर्ष स्थापना दिवसको अवसरमा रक्तदान कार्यक्रम गर्दै आइरहेको जनाएको छ । रक्तदान कार्यक्रम बिहान १० बजेसम्म संचालन भएको थियो । कार्यक्रममा २३ जनाले रक्तदान गरेका थिए । यसमध्ये १७ जना पुरुष र ६ जना महिला थिए । रक्तदान कार्यक्रममा सहभागी भएका व्यक्तिहरुलाई सहकारीले प्रमाणपत्र पनि प्रदान गरेको छ ।
सहकारीका अध्यक्ष रामकृष्ण प्रजापतिले सहकारी सामाजिक संस्था भएकोले नाफाको लागि मात्र नभई सामाजिक सेवा पनि गर्नुपर्छ भन्ने उद्देश्यले रक्तदान कार्यक्रम गर्दै आइरहेको बताए । अहिलेसम्म वर्षमा एक पटक संस्थाको स्थापना दिवसको अवसरमा रक्तदान कार्यक्रम गर्दै आईरहेको तर आगमी दिनमा अर्धवार्षिक रुपमा रक्तदान कार्यक्रम संचालन गर्ने अध्यक्ष प्रजापतिले बताए । साथै उदय साकोस संचालक समिति सदस्य तथा नियमित रक्तदाता सोहन रंजितले आफूले तीनतीन महिनामा रक्तदान गरिरहने र ५३ पटकसम्म रक्तदान गरिसकेको बताए । रंजितलाई समाजसेवामा रुचि भएको कारण यस्ता विभिन्न कार्यक्रमहरुमा स्वयम्सेवकका रुपमा भूमिका निर्वाह गर्दै आइरहेको उनले बताए । मानिसको जीवन अमूल्य छ र सही समयमा रगत नपाएर मानिसहरुको ज्यान जाने गर्छ, त्यसैले आवश्यकता परेको बेलामा सबैले सहज तरिकाले रगत पाउनका लागि अरुले पनि रक्तदान कार्यक्रममा सहभागी हुनुपर्ने रंजितले बताए ।
फाेटाेमा हेर्नुहाेस्...
Comments
