आर.के. निर्मलया मचा उपन्यास पिदन
पुष १८, २०८०, बुधबार | दिउँसो १२:२७ बजे | 25
येँ÷साहित्यकार लिसें पुलांम्ह पत्रकार आर.के. निर्मलं भाय् हिलाः च्वयादीगु मचा उपन्यास ‘अजूचायापुगु जादुया भुखाचा’ सार्वजनिक जूगु दु । साहित्यकार आर.के. निर्मलया न्हापांगु ज्याःजंक्वया लसताय् लहना मिडियाया लुखां उगु उपन्यास सफू पिदंगु खः । वंगु शनिबाः जंक्व भ्वय्या दथुइ हे छगू ज्याझ्वः यासें उपन्यासया लोकार्पण याःगु खः । नेवाः न्ह्यलुवाःलिसें अधिकारकर्मी नेता मल्ल के. सुन्दर, लहना मिडियाया नायः नृपेन्द्रलाल श्रेष्ठ, व्यवस्थापक सुरेन्द्रभक्त श्रेष्ठ, साहित्यकार आर.के. निर्मल व वय्कःया तिरिमय्जु बिन्दीरा राजोपाध्यायलिसें वय्कःपिनि परिवारं सफूया लोकार्पण यानादिल ।
सफूया विमोचन धुंकाः न्ववासें नेवाः न्ह्यलुवाः मल्लं भाषा आन्दोलनलिसें पत्रकारिता क्षेत्रय् थः पुलांम्ह सहकर्मी आर. के. निर्मलया उपन्यास सार्वजनिक जूगुलिइ लसता प्वंकादिल । ‘भाषा आन्दोलननिसें जिं इनाप वाःपौ पिथनाच्वनागु इलय् जितः मदिक्क सक्रिय रुपं साथ ब्यूम्ह पासा आर.के. निर्मलया ज्याःजंक्वकुन्हु काय्पिं जानाः पिथंगु थ्व सफू हे वय्कःयात दकले तःधंगु सगं खः’ नेवाः न्ह्यलुवाः मल्लं धयादिल । ‘दथुइ छुं ई दिपाः काःगु निर्मलया च्वसा आः गबलें मदीमा, न्ह्यानाः तुं च्वनेमा, न्हून्हूगु श्रृजना जुयाच्वनेमा, जिगु भिन्तुना’ मल्लं धयादिल । साहित्यकार निर्मलया चिधिकःम्ह काय् बिराजकाजी राजोपाध्यायं करीब न्यादँ न्ह्यःहे तयार जुइधुंकूगु सफू लकडाउनलिसें थीथी हुनिं पिदने मफयाच्वंगु व जंक्वबलय् थः अबुं हे मसीक सरप्राइज गिफ्टया रुपं सफू पिथनागु जानकारी बियादिल । ‘पिकाकः संस्थाया व्यवस्थापक सुरेन्द्रभक्त श्रेष्ठ, कभर डिजाइनर व स्केच आर्टिस्ट सचिना राजोपाध्याय, ले आउट डिजाइनर रोशन राजोपाध्याय व जिं जक स्यू, च्वमिं हे सफू पिदनेत्यंगु दु धकाः मस्यू’ राजोपाध्यायं धयादिल । ‘वय्कःया हे जंक्वया लसताय् जिमिसं थ्व सरप्राइज गिफ्टया रुपं थ्व सफू देछाना ।’
चाङ थ्येन ईं च्वयादीगु चाइनिज उपन्यासयात श्यामा बल्लभं अनुवाद यानाः ‘जादुकी तुम्बी’ नामं हिन्दी भाषां पिथंगु खः । व हे हिन्दी उपन्यासयात साहित्यकार आर.के निर्मलं नेवाः भाषां हीकाः विश्वभुमि न्हिपौया शुक्रबाःया तँसापतिइ धारावाहिक रुपं पिथनादीगु खः । न्हापा विश्वभुमि पत्रिका हे दिनावंबलय् शुक्रबाःया तँसापतिइ पूवनेमफूगु बाखंयात आः सफूया रुपं पूर्णता बीखंबलय् जि थौं लय्ताः’ निर्मलं धयादिल । ‘जिं हे मसीक थ्व सफू थुकथं पिदंबलय् जि धात्थें हे अजू चाल, जिगु लागिं थ्व धात्थें हे सरप्राइज गिफ्ट हे जुल ।’
ज्याझ्वलय् लहना मिडियाया नायः नृपेन्द्रलाल श्रेष्ठ, व्यवस्थापक सुरेन्द्र भक्त श्रेष्ठं करीब न्यादँ न्ह्यःनिसें पिथने धाधां लिबानाच्वंगु सफू, च्वमिया हे ज्याःजंक्वकुन्हु पिथनेखंगुलिइ थःपिन्त गौरवया अनुभूमित जूगु धयादिल ।
सफूया प्रकाशक लहना मिडिया खः । सफूया द्यबः डिजाइन सचिना राजोपाध्यायं याःगु दुसा लेआउट डिजाइन रोशन राजोपाध्यायं यानादीगु दु । सफूया मू न्यासः तका तयातःगु दु । सफू बुकिङ याःपिन्त होम डेलिभरीया सुविधा दुगु लहना मिडियां जानकारी ब्यूगु दु ।
फाेटाेमा हेर्नुहाेस्...
Comments
.jpg)
.jpeg)
.jpeg)
