नदी जीवन
2020-09-01 03:17:54
- भक्तलक्ष्मी भासिमा कुसी
घुमिरहेको पृथ्वीको
परिक्रमण र परिभ्रमणको
अनवरत गतिशीलताले बोकेर ल्याउँछ
केही चुनौती केही अवसर
मनुष्य तिमी कति सक्छौ ?
सहन ?
जुध्न ?
हतास नभई आशावादी हुन ?
या हात उठाइ पो हाल्छौ कि ?
या घुँडा टेक्न पो आट्यौ कि ?
तत् क्षण अदृश्य शक्तिमा अदृश्य आवाज ठोकिन्छ
र बोल्दछ
होइन यो तिम्रो मानव चोला
हारेर आफैलाई खुम्च्याउने ।
होइन यो तिम्रो पाइला
नहिडी थाके म भन्दै लम्पसार पर्ने ।
होइन तिम्रा ती आँखा
उज्यालो भोलिको नपर्खी अँध्यारै हो जीवन भन्ने ।
समय गतिशिलताको पर्याय
रुपान्तरणको संगीतको तरङ्गमा
उक्लिदै र ओर्लिदै
घामछायाँमा अनेकन रङ्ग पोत्दै
बगिरहेछ यात्रामा
अनवरत यात्रामा
त्यहीँ यात्राको यात्री हामी
बग्न जाने सरस बन्छ नदीमा बगिरहने कन्चन पानीजस्तो
बग्न नजाने कठिन बन्छ बगरको रुग्ण र रुखो चट्टान जस्तो ।
प्रतिक्रिया
