मिनर्वा शाक्य (बज्राचार्य)या “दुःख दुःख सकसित दुःख”या भिडियो पिदन

कृष्ण प्रजापति
“दुःख दुःख सकसित दुःख”या भिडियो म्ये संकिपाःया पिथना ज्याझ्वः पूर्व राजदूत डा.अन्जान शाक्यया मूपाहाँसुइ आइतवाः येँया विशालबजारय् च्वंगु बेण्टो रेष्ट्रोय् जुउगु दु । संसार दुने अनेक कथंया सुखदुःखत दयाच्वनी, अले दुःखया निवारण व सुखःया अनुभूति यायेगु नं यक्को लँपु दयाच्वनी । दुःख छाय जुइ, सुःख गनं प्राप्त जुइ धैगु महामानव गौतमबुद्धया दर्शनयात लिधंसा कया बरिष्ठ म्येच्वमि संघरत्न शाक्यं उगु म्ये च्वयादीगु खः ।
थ्व म्ये मिनर्वा शाक्य(बज्राचार्य)या सलय् रेकर्ड जुयाः वयकः पाखें हे थ्व म्ये संकिपाः दयेकेगु ज्या जुगु खः । थ्व म्ये संकिपा चर्चित संकिपाः जामनः गुभाजुया निर्देशक व परिकल्पनाकार रवि सायमिया निर्देशन व सम्पादनय् तयार जुउगु खः । थ्व म्ये संकिपाया फोटोग्राफी संकिपामि भवानी शिलाकारं यानादिगु खः । अले सोनाली शिल्पकारं समाः यायेगु ज्या यानादीगु थ्व म्ये संकिपाय् नांजाःपिं कलाकार सबिन शाक्य, श्यामसुन्दर शिल्पकार, अर्णेश्वरी शिल्पकार, रबिना शाक्य पिन्सं म्हितादीगु दु  । थ्व म्ये संकिपा पिथनाया आज्जु धैगु महामानव गौतमबुद्धया नैतिक ज्ञान सकसिनं इना कायेमा धैगु खः धकाः म्येच्वमि संघरत्न शाक्यं खँ तयादिलसा  गुबलेतक नुगः दुने असन्तुष्टीं थाय कयाच्वनी, उबलेतक व दुःखं मुक्त जुइमखु धकाः न वयकलं धयादिल ।
थुगु म्ये संकिपाय् श्रद्धयी धम्मावती गुरुमां, केशाावती गुरुमां, खेमावती गुरुमां, इन्द्रावती गुरुमां, अमता गुरुमांपिनिगु नं स्वापू दुसा थुके कलाकार कथं श्यामसुन्दर शिल्पकार, अर्णेश्वरी शिल्पकार, सबिन शाक्य व रबिना शाक्यपिन्सं अभिनय यानादीगु दु ।