कृष्ण प्रजापति
नेपाःया दकलय् तःधंगु धाःगु मोहनि नखः मन्यायेकीगु खोनाय् सिकालि द्यःया तःजिगु जात्रा शुरु जूगु दु । खोनाय् मोहनिया नःलास्वां पीगु ज्या जुइ मखु । बरु उकिया पलेसा सिकालि द्यःया जात्रा जुइ । थन जुइगु सिकालि द्यःया जात्रा धाःसा येँय् च्वंम्ह पचलि भैरवया जात्रालिसे ज्वःलाः । येँय् पचिम¥हः कुन्हु चान्हय् पचलि भैरवया त्यपयात जात्रा याइगु खःसा खोनाय् नं पचिम¥हः कुन्हु हे चान्हय् त्यपया हे जात्रा जुइ । खोनाय् जुइगु त्यप जात्रा सुनानं स्वये मजिउ धाइ । खोनाया मू जात्रा नं थ्वहे खः।
मेमेथाय् अष्टमि व नवमि कुन्हु कूछिभ्वय् व स्याक्वत्याक्व धकाः भ्वय् नयेगु याइसा खोनाय् धाःसा थ्व निन्हु बाजं थायेगु, गं न्यायेगु व सुलि पुइगु तकं बन्द याइ । थन गनं न्यायेकी धकाः वकुन्हु देगलय् च्वंगु गं चिना तयेगु याइ । थ्व निन्हु देय्न्यंकं मारकाट जुइगु जुयाः करुणामय थन च्वं बिज्याइगु कारणं वसपोलया शान्ति खलबल मजुइमा धकाः बाजं मथाइगु खः धइगु स्थानीय मनूतय् धापू दु । खोनाय् मोहनि न्यायेकेगु मयाःसां नवमि कुन्हु धाःसा मोहनि पूजा धकाः हाकुगु सिन्हः तीगु चलन दु ।
मेपिनि जूसा मोहनिया नवमि कुन्हु छेँय् च्वंगु ल्वाभः स्वनाः पुज्यायेगु याइ । खोनाय् सापारु कुन्हु हतियार स्वनाः पुज्यायेगु याइ । सापारुयात थन ‘खोना मोहनि’ धकाः हनेगु याइसा सायाः पिकायेगु ज्या धाःसा वयां कन्हय् कुन्हु याइ । यल देसय् सापारुयां कन्हय् कुन्हु मतयाः पिकाइ । खोना यल देय्या हे छगू गां खःसां थन मतयाः धाःसा पिकाइ मखु, येँय् थें सायाः हे पिकाइ । खोनाया स्थानीय मनूतय्सं नवमि कुन्हु ल्वाभः वा ज्याभः पुज्यायेगु मयाःसां थौंकन्हय् पिनें वःपिं छुं छुं मनूतय्सं धाःसा नवमि कुन्हु थःपिनि सवारी साधन पुज्यायेगु याना हयाच्वंगु दु । खोनाय् सिकालि द्यःया जात्रा जुइबलय् न्हापा जूसा लाकां न्ह्यायेगु, कुसां कुइगु, खाया ला व ख्येँ नयेगु तकं बन्द जुइगु चलन दुगु खः ।

...

All Comments.......


Please Login/Register To Comments