ख्वपया बोडेय् निलबाराही प्याखं न्ह्यात
कृष्ण प्रजापति
सापारुया कन्हय् कुन्हुनिसें न्ह्याइगु ख्वपया लोकंह्वाःगु निलबाराही प्याखं म्हिगः शुक्रवाःनिसें न्ह्याःगु दु । थ्व निलबाराही प्याखं मध्यपुर थिमि नगरपालिकाया बोडेय् प्यन्हु प्यचातक क्यनेमाःगु द्यः प्याखं खः । थुगु निलबाराही प्याखं क्यनेगुयात बोडेया लोकंह्वाःगु मेप्वाः खनीगु जात्रा व विस्केट जात्रालिपाया तःधंगु पर्वया रुपं कयातःगु दु ।
निलबाराही प्याखनय् भैरव, निलबाराही, कुमारी, सिंह, द्वारपाल, क्षेत्रपाल व गणेद्यःलिसेंया देवगणपिं प्याखं ल्हुइगु याइ । प्याखंयात मूध्वाखां पिकायेधुंकाः थीथी त्वालय् च्वंगु देगः द्यःपिं चाःहिलेगु याइ । प्याखंया झ्वलय् देवगणपिन्सं छुं नइमखु, सुंलिसें न्वःतुइमखु व गनं नं फयेतुइ मखु । द्यःया ख्वाःपाः पुयातःपिं देवगणपिं प्याखं ल्हुयाच्वनीगु इलय् छेँ छेँपाखें पूजा हइपिनिगु हुलमुल हे जुइ । मल्लकालीन इलय् मध्यपुर थिमिइ भूतप्रेत, पिशाच लिसेंया दानवरुपी आत्मां दुःख कष्ट बिइधुंकाः सापारुया कन्हय् कुन्हुनिसें इमिगु कष्टपाखें मुक्त जुइगु नितिं प्याखं पिथंगु स्थानीय बासिन्दापिनिगु विश्वास दु ।
