नीलः सांस्कृतिक पुचःया ग्वसालय् ‘बाँसुरी खलः पुचः महोत्सव’ जुइग
कृष्ण प्रजापति
स्वनिगःलिसें स्वनिगलं पिने व येँया दक्षिण पश्चिम भेगय् लोकंह्वाःगु सांगितिक पुचः नीलः सांस्कृतिक पुचःया १४ क्वःगु बुदिंया लसताय् १० नम्बर क्षेत्र ‘बाँसुरी खलः पुचः महोत्सव’ जुइगु जूगु दु । नीलः सांस्कृतिक पुचःया ग्वसालय् जुइगु उगु १० नम्बर क्षेत्र ‘बाँसुरी खलः पुचः महोत्सव’ ग्वसाः ग्वयेगु नितिं तयारी ज्याझ्वः जुयाच्वंगु जानकारी बिसें पुचःया संस्थापक नायः लिसें संगीतकःमि तेजमान बज्राचार्यं याकनं हे ज्याझ्वः जुइगु तिथि घोषणा यायेगु जानकारी बियादीगु दु ।
कोरोना भाइरस कोभिड १९ महामारी संक्रमणया हुनिं व संक्रमण रोकथामया नितिं जुयाच्वंगु लकडाउनं यानाः वंगु दँय् हे नीलः सांस्कृतिक पुचःया बुदिंया लसताय् जुइमाःगु ज्याझ्वः स्थगित जुयाच्वंगु जानकारी बिसें नायः भाजु बज्राचार्यं आः लकडाउन खुल्ला जुइखतं हे १० नम्बर क्षेत्र ‘बाँसुरी खलः पुचः महोत्सव’ ज्याझ्वः तःजिक ग्वसाः ग्वयेगु जानकारी बियादीगु दु । नीलः सांस्कृतिक पुचः बि.सं. २०६४ साल मंसीर ५ गते पलिस्था जूगु खः । थुगु पुचलं किपू लागालिसें किपूलिं पिने दक्षिण पश्चिम भेग, स्वनिगः व स्वनिगलं पिने आपालं थासय् ज्वःमदुगु सांस्कृतिक व सांगितिक ब्वज्या ज्याझ्वः न्ह्याकाः वयाच्वंगु दु ।
विशेष रुपं नेवाः संगीत, नेवाः सांस्कृतिक लिसें समग्र नेवाः जातिया म्हसीका लिपातक नं ल्यंकाः तयेगु नितिं पलाः न्ह्याकाः वयाच्वंगु पुचः खः नीलः सांस्कृतिक पुचः । नीलः सांस्कृतिक पुचःया नायः तेजमान बज्राचार्यं बियादीगु जानकारी कथं आः जुइगु ‘बाँसुरी खलः पुचः महोत्सव’य् साउण्ड सिस्टम, स्टेज व लाईट सिष्टम अति आकर्षक जुइगु जुइ । उगु महोत्सवय् ब्वति कायेत येँ क्षेत्र नम्बर १० या सकल बाँसुरी खलः पुचःयात ग्वसाः खलः नीलः सांस्कृतिक पुचलं इनाप याःगु दु ।
