विद्यार्थीहरूलाई चाइनिज राजदूतावासद्वारा छात्रवृत्ति

मध्यपुर ठिमी भक्तपुर विद्यार्थीको सर्वाङ्गीण विकासलाई जोड दिँदै आएको मध्यपुर ठिमी भक्तपुरको अग्रणी विद्यालय विनायक शिक्षा निकेतन इङ्लिस स्कुलका तीनजना विद्यार्थीहरूले चाइनिज राजदूतावासबाट छात्रवृत्ति प्राप्त गर्न सफल भएका छन्।

अतिरिक्त क्रियाकलापमा नेतृत्व र संलग्नता पढाइमा अबलता तथा चाइनिज भाषा र विभिन्न गतिविधिमा उत्कृष्टता हासिल गरेको आधारमा चाइनिज राजदूतावासले उनीहरूलाई अध्ययनका लागि छात्रवृत्ति प्रदान गरेको हो। सो छात्रवृत्तिको छनोटमा विद्यालयका छात्राहरू नायरा प्रजापति चार्बी बाडे र निमा तामाङ पर्न सफल भएका थिए। जसमा छात्रा नायरा प्रजापतिले रु १ लाख प्राप्त गर्न सफल भएकी थिइन् भने चार्बी बाँडे र निमा तामाङले क्रमश ५० /५० हजार प्राप्त गर्न सफल भएका थिए।

सो छात्रवृत्तिको चेक हस्तान्तरण कार्यक्रममा विद्यालयका संस्थापक प्रिन्सिपल सुरेन्द्रविक्रम प्रजापतिले अनुशासित बनी हरेक क्रियाकलापमा सक्रिय सहभागी भए कुनै पनि विद्यार्थीले नेतृत्व क्षमताको विकास गर्न सक्ने र भविष्यमा सफल व्यक्ति बन्न सक्ने भएकाले सम्पूर्ण विद्यार्थी लगनशील र मेहनती बनी अगाडि बढ्न विद्यार्थीहरुलाई सुझाव दिनुभएको थियो।