वाकुपति चाँगुनारायण द्यथाय् लक्षाहुति महायज्ञ जुल

भक्तपुर । धार्मिक क्षेत्रय् हे अति दुर्लभ तायेकीगु लक्षाहुति महायज्ञ ख्वपया वाकुपति चाँगुनारायण द्यथाय् वंगु जेठ २५ गते सुरु जुयाः बिहिवाः तक न्ह्यानाच्वंगु दु । गुन्हु तक न्ह्याइगु थुगु महायज्ञय् लाख पल्ट होम यायेमाःगु कारणं लक्षाहुति धयातःगु खः । छगू मन्त्र ब्वनेगु इलय् हे लाखक्वः होम यायेमाःगु थुगु महायज्ञय् देश व जनताया निरोगी व शान्तिया कामना याना न्ह्यानाच्वंगु खः । भुखाय् मब्वयेमाः, धाकुफय्सं मनू छुं मजुइमाः व सत्रु नाश जुइमाः धइगु ल्याखं झिंखुता व झिंच्याताजि सिं आहुति बियाः थुगु यज्ञ पूवंकीगु खँ यज्ञय् संलग्न जीवन विज्ञानया अध्ययता हरिशरण राजोपाध्यायं कनादिल । वातावरण स्वच्छ यानाः निरोगी कामना यायेत थौं स्वयां पीदँ न्ह्यः छक्वः ख्वपया लाय्कुलि थुकथंया होम जूगु खः ।
    थीथी जडिबुटीया संयोजक याइगु व सामुहिक भावना ब्वलंकेगु निंतिं थुगु महायज्ञ गुन्हु तक जुयाच्वंगु खः । झिंनिम्ह राजोपाध्याय ब्रम्हुपाखें न्हिया न्हिथं पूजा पाठ व होम याना थ्व कर्म पूवंकाच्वंगु दु । न्हिं छछाक जक नयाः निम्ह अजिपिंसं पबित्र जुयाः यज्ञस्थलय् हे बुकूगु जा छछाक नयाः थ्व कर्म पूवंकेमाः । २०३२।३३ सालं ख्वपया लाय्कुलि जूसानिसें थुगु कथंया महायज्ञ ख्वपय् मजूनि । दक्ष बःजुपिं च्वना यायेमाःगु थुगु महायज्ञ यायेत प्यदँ न्ह्यः हे स्थानीय आशाकाजी प्रजापतिं भूमिइ हलो जोते यानाः अन त्यछ्वः ह्वलाः त्यछ्वः सयेकाः खुला लिपा ज्याझ्वः यायेगु क्वछिउगु खः । तर कोरानाया कारणं थुगुसी जक उगु त्यछ्वः होम याना यज्ञ याःगु खः । आः तःजिक चांन्हिं धइथें थुगु महायज्ञया रिति पूवंकाच्वंगु दु ।
    २०१४ सालय् छक्वः लालाछेँ त्वालय् थुकथंया लक्षाहुति महायज्ञ जूगु खः । थुगुसी लवकुस राजोपाध्यायया नेतृत्वय् ब्रम्हुया भूमिकाय् हरिशरण राजोपाध्याय, उद्यात्रीया भूमिकाय् विनोदराज राजोपाध्याय, अग्नि बियेत बालम शर्मा, ऋतिकया भूमिकाय् प्रभुशरण राजोपाध्याय, महेन्द्रराज, अरुण शर्मा, सरोजन शर्मा व अभिषेक शर्मा च्वनाः थुगु कर्म पूवंकाच्वनादीगु दु । खौमाय् च्वंम्ह साइला बाज्यां प्रशिक्षण बियालिं जक थःपिसं थुगु कर्म पूवंके फइगु कथं तयारी जूगु खँ धाःगु दु । अति दुर्लभ थुगु कर्म पूवंकेत न्हापा यलं राजोपाध्याय ब्रम्हुत हइगु खः । २०१४ सालय् लालाछेँ जूबल् लवकुस बःजुया नेतृत्वय् महायज्ञ जूगु खः । अथेहे लाय्कुलिइ जूबलय् रत्न बजूया नेतृत्वय् थुगु महायज्ञ क्वचायेकूगु खः । अथेंतुं भ्वँतय् जूगु इलय् दामोदर राजोपाध्यायया नेतृत्वय् थुगु महायज्ञ पूवंकूगु खः ।
    सुथय् सुथय् न्हिया न्हिथं कर्माचार्य आचाजुपाखें देशबली पूजा यानाः अष्टमातृकायात हना थ्व कर्म न्ह्याइ । न्हापा न्हापा ऋषिमुनितय्सं याना वयाच्वंगु थुगु कर्म २०१५ सालं छक्वः थुगु हे वाकुपति चाँगुनारायण द्यःके मगरा बजुं याकूगु खः । नीच्याफा अन्न न्हिया न्हिथं आहुति बिया याइगु थ्व महायज्ञया लागिं नीगु लाख तका दां फ्याना तयागु वाकुपति चाँगुनारायण उपभोक्ता समितिया दुजः लक्ष्मीप्रसाद प्रजापतिं कनादिल । लाय्कुलिइ यज्ञ याःगु इलय् सल्लाघारीया वनय् सरस्वतीया मूर्ति स्थापना याये यंकूथें आः थुगुसी अन उमामहेश्वरया मूर्ति स्थापना यायेगु लक्ष्यं द्यः स्थापना यानाः पूजा जुयाच्वंगु दु । समाजवादी दृष्टिकोणं प्रेरित जुयाः थुगु महायज्ञया ज्या न्ह्यानाच्वंगु खँ कनादीम्ह अध्ययता हरिशरण राजोपाध्ययया कथं महायज्ञं पिहां वइगु त्यछ्व, हाम्व, जाकि व शुद्ध घ्यया कुं नगर न्यंकं बैज्ञानिक रुपं नं नस्वाः ह्वलाः सफागु वातावरण कायम याइगु तर्क तयादिल ।