ख्वप मिडिया सर्कलपाखें कलाकार आशाकाजी थकुयात हन

कृष्ण प्रजापति
ख्वप मिडिया सर्कलपाखें ख्वपया सिद्धिगणेश तालिम हलय् जूगु छगू ज्याझ्वःया दथुइ कलाकार आशाकाजी थकुयात हनेज्या जुल । ख्वप मिडिया सर्कलया नायः राजु मानन्धरं वय्कः मूपाहां कथं झायादीगु बिस्काः जात्रा विशेष ज्याझ्वलय् दोसल्लां न्ययेकाः हना पौ लःल्हासें हनेज्या यानादीगु खः । ज्याझ्वलय् मूपाहां सम्मानित ब्यक्तित्व कलाकार आशाकाजी थकुलं थःपिसं न्हापा दुःख सियाः ख्यालः व नेपालभाषा संकिपा लागाय् याना च्वनागु योगदान सितिं मवंगु खँ कनादिल । तत्कालीन राजनीतिक अवस्थाया बारे थःपिसं ध्याचू नकु नकुं ख्यालःया लागाय् थःपिं ख्वपय् न्ह्याब्लें न्ह्यने लानाच्वंगु खँ कनादिसें वय्कलं स्वनिगः व स्वनिगलं पिने वना तकं ख्यालः क्यनेत वनाबलय्या अनुभव न्यंकादिल ।
    दबुलि नेपालया संरक्षक व संस्कृतिकःमि गणेशराम लाछिं थःगु म्हसीका ल्यंका नेवाः पहिचान म्वाका तयेत झी सकलें छप्पँ जुयाः न्ह्याः वनेमाःगु ई वःगु खँ कनादिल । ज्याझ्वलय् नेपालभाषा साहित्य तःमुँज्याया छ्याञ्जे नरेश खत्री, महानगरीय प्रहरी प्रभाग जगातिया निरीक्षक सूर्यबहादुर खत्री, कलाकार श्यामसुन्दर शिल्पकार, नाट्यकर्मि समाज नेपालया अध्यक्ष लक्ष्मीप्रसाद चवाल व ज्याझ्वःया संयोजक सुरेन्द्र श्रेष्ठपिसं नं न्ववानादिल । समारोहय् सरिता प्रजापति, गंगाराम प्रजापति, राजकुमार मानन्धर, विष्णुसुन्दर देशेमरु, रोशन धोभडेल व कल्पना श्रेष्ठपिसं म्ये न्यंकादीगु खः । शान्ति राजबाहक व कृति बासुकलापिसं हुलाप्यंनं न्यंकादीगु ज्याझ्वलय् कलाकारतय्गु सम्मान नं जूगु खः ।