बिस्काः जात्रा तःजिक हनेत ख्वपय् तःजिगु तयारी सुरु

कृष्ण प्रजापति
विश्व प्रसिद्ध बिस्काः जात्रा तःजिक हनेत ख्वपय् ख्वप नगरपालिकां तःजिक तयारी न्ह्याकूगु दु । थगुने जिल्ला प्रशासन कार्यालय व ख्वप नगरपालिकां कोरोना भाइरसया महामारी अप्वः खने दयावःगु धासें बिस्काः जात्रा माने मयाकेगु निर्णय याःगु खः । तर उकि स्थानीय जनतां असहमती क्यनाः चांन्हिं बिरोधया ज्याझ्वः यारी यायेवं थुगु जात्रा सुचारु यायेत ख्वप नगरपालिका व जिल्ला प्रशासन ज्याकू बाध्य जूगु खः । थुगुसी नं अज्याःगु थीथी कथंया असमझदारी पिहां वइ धकाः ख्वपय् इलय् हे जात्रालिसें सम्वन्ध भैलः नायः, जात्रा ब्यवस्थापन समिति व वडाया मुँज्यां शान्तिपूर्ण रुपं जात्रा क्वचायेकेत थीथी कथंया निर्णय याःगु खः ।
सरोकारवालातय् मुँज्याय् ख्वप नगरपालिकाया मेयर सुनिल प्रजापतिं न्हापा न्हापाया तुलनाय् ख्वपय् बिस्काः जात्रा शान्तिपूर्ण रुपं चले जुयावःगु लसताया खँ कनादिसें थीथी पक्षं थः थःगु जिम्मेवारी इलय् हे पुवंक क्वज्यूगु इलय् जात्रा क्वचायेकेत सकसितं इनाप यानादिल । जात्रा लिबाक न्ह्याइगु कारणं बारम्बार ल्वापू जुइगु जुयाच्वंगु दु । थुकिं आन्तरिक व वाह्य पर्यटक तकं आपालं उपस्थित जुइगु बिस्काः जात्रायात नकारात्मक रुपं नालेगु तकं सुरु जुयाच्वंगु दु । उकिं थुगुसी ख्वप नगरपालिकां सम्वन्धित सरोकारवाला निकायलिसें समन्वय यानाः सहकार्य न्ह्याकाच्वंगु खः ।
मुँज्यां बिस्काः जात्रा तःजिक न्यायेकेत माःगु स्वास्थ्य मापदण्ड नालाः सुरक्षित जुइत प्रचार प्रसारया ज्या यायेगु, बिस्काः जात्रा सम्वन्धी सकतां कथंया पूजा व जात्रा इलय् हे सुरु यानाः इलय् हे क्वचायेकेत गुथि संस्थान ख्वपयात जिम्मा बियेगु व भैलः नायः, जात्रा ब्यवस्थापन समिति व वडा कार्यायलयात थुकिया लागिं जिम्मेवारी बियेगु क्वछिउगु दु । जात्राया लँय् लाःगु लागाय् अब्यवस्थित रुपं पिनातःगु तार, केबल व फाइबर नेटया तार चिकेगु निंतिं सम्वन्धित पक्षलिसें याकनं बैठक च्वनेगु क्वछिउगु दु । नापं बिस्काः जात्राया म्हिगःया कमी कमजोरीयात वाः चायेक पाठ सयेकाः ज्या इलय् हे क्वचायेकेगु खँय् ख्वपया प्रमुख जिल्ला अधिकारी रुद्रादेवी शर्मां नं बः बियादीगु दु । मुँज्याय् ख्वप नगरपालिकाया उपमेयर रजनी जोशी, प्रहरी उपरीक्षक शिवकुमार शर्मा, वडा अध्यक्ष कुमार चवाल व प्रेमगोपाल कर्माचार्य, प्रमुख प्रशासकीय अधिकृत कृष्ण गिरीपिं सहभागी जुयादीगु खः ।