किपुलिइ चैत ११ व १२ गते प्यक्वःगु नेपालभाषा साहित्य नखः जुइगु

कृष्ण प्रजापति
किपू नगरपालिकाया प्रायोजनय् सन्ध्या टाइम्स पिथना प्रालिया नेपालभाषा टाइम्स न्हिपौया ग्वसालय् थ्वहे वइगु नेपाल संवत ११४२ चिल्लागा अष्टमि व नवमि (चैत ११ व १२ गते) निन्हु यंकं किपुलिइ प्यक्वःगु नेपालभाषा साहित्य नखः जुइगु जूगु दु । नेपालभाषा साहित्यया विकासया उद्देश्य तयाः न्यादँ न्ह्यःनिसें थुगु नखः यलया सुन्दरी चोकय् निक्वः व नेपाल प्रज्ञा प्रतिष्ठान कमलादीइ छक्वः यानाः स्वक्वः तक जुइधुंकूगु दु । थगुने कोरोना भाइरसया महामारीया कारणं थुगु नेपालभाषा साहित्य नखः याये मफुगु खः ।
    थुगुसी किपू नगरपालिकाया विशेष ग्वाहालिं किपूया लाय्कू लागा व पांगाय् यानाः निगू थासय् निन्हुयंकं थुगु नखः न्यायेकेत्यंगु दु । नेपालभाषा साहित्य नखःया उलेज्या नेपालभाषा एकेडेमीया हल न्याम्हसिमाय् शुक्रवाः ११ः३० ताः इलय् जुइगु पत्रकार सम्मेलनय् जानकारी बिउगु दु । पत्रकार सम्मेलनय् बिउगु जानकारी कथं थुगुसी न्यागू न्हूगु नेपालभाषाया सफू नं विमोचन जुइत्यंगु दु । उकि पूर्णराम मुनंकर्मिं च्वयादीगु निबन्ध मुना नेवाः गौरब, रामभक्त कायस्थया हाइकु मुना लखय् लूगु किचः, राजेन्द्रकुमार पुताया सांस्कृतिक उपन्यास खिउँ फल्चा, स्नेह साय्मिया चिबाखं मुना स्नेह साय्मिया चिबाखं व नेपालभाषाया नांजाःम्ह साहित्यकार गिरिजाप्रसाद जोशीया उपन्यास मुना गिरिजाप्रसादया उपन्यास दुथ्याः ।
    ख्यालः स्वपू नेवाः नुगः, एमसिसि व आः छु ले ? नं प्रस्तुत जुइगु उगु नेपालभाषा साहित्य नखःया दथुइ छधाः प्याखं दुघाः नं क्यनीगु ग्वसाः दु । थुगु ज्याझ्वलय् स्कुलय् नेपालभाषा पठन पाठनया ब्यवस्था यानाः नेपालभाषा विकासय् महत्वपूर्ण योगदान यानादीपिं येँ महानगरपालिकाया मेयर विद्यासुन्दर शाक्य, यल महानगरपालिकाया मेयर चिरिबाबु महर्जन व किपू नगरपालिकाया मेयर रमेश महर्जन व उपमेयर सरस्वती खड्का रिजालयात नं हनीगु ज्याझ्वः तयातःगु दु । न्हापांगु दिं ११ चैत कुन्हु शुक्रवाः ११ः३० ताः इलय् उलेज्या लिपा अनंनिसें किपू लाय्कू तकया सांस्कृतिक पदयात्रा ज्याझ्वः नं तयातःगु दु । वयां लिपा २ बजेनिसें लाय्कू लागाय् नियमित ज्याझ्वः न्ह्याकीगु ग्वसाः दु ।
    सातिकुन्हु न्हिनय् १ बजेनिसें किपूया पांगा लाछि त्वालय् सांस्कृतिक ज्याझ्वः, सांस्कृतिक अन्तरक्रिया नापं बाखं, कविता, गजल, हाइकू न्यंकेगु ज्याझ्वः तयातःगु दु । निन्हुं हे सफू ब्वज्या व मियेज्या नापं नेवाः नसा ज्वलं ब्वज्या व मियेज्या यानाः थुगुसी तःजिक नेपालभाषा साहित्य नखः न्ह्याइ । ज्याझ्वलय् जनकवि दुर्गालाल श्रेष्ठ, वरिष्ठ साहित्यकार मल्ल के. सुन्दर लगायत आपालं साहित्यिक ब्यक्तित्वतय्त ब्वनातःगु दु । ज्याझ्वः न्हय्गू सेसनय् चले जुइगु खँ पत्रकार सम्मेलनय् नेपालभाषा साहित्य नखः ग्वसाखलःया संयोजक रमेशकाजी स्थापितं जानकारी बियादिल ।