येँय् न्हापांगु नेपालभाषा साहित्य तःमुँज्या रोहितपाखें उलेज्या

कृष्ण प्रजापति
नेपाल मजदुर किसान पार्टीया केन्द्रीय अध्यक्ष नारायणमान बिजुक्छेँ रोहितं नेपाः बैंक्वेटय् जूगु छगू ज्याझ्वःया दथुइ न्हापांगु नेपालभाषा साहित्य तःमुँज्याया उलेज्या यानादिल । वय्कलं ज्यापु जातिया म्हसीका जुयाच्वंगु धुंन्याः संरक्षण यायेगु ज्याय् ग्वाहालि यानाच्वंगु कारणं येँया ज्यापु महागुथिया पुचःयात हनापौ लःल्हासें हनादिल । उगु ज्याझ्वलय् वय्कलं ध्यबा कयाः मनू स्याइपिं कन्ट्याक्ट किलर कथं नेपाल सरकारं थीथी देसय् युद्धय् मनू छ्वयाः स्यानाच्वंगुलिं देय्या बेइज्जत जूगु कनादिसें सदन दुने गुम्ह मनुखं बेलायती सेनाय् गोर्खाली सेना छ्वयेगु खँ बः बियाच्वंम्ह खः, उम्ह मनुखं हे ५ प्रतिशत मवःगु पार्टीयात राष्टिय मान्यता बीमज्यू धइगु प्रावधान प्रस्ताव यानाः थःपिंत ध्याकुनय् लाकूगु खँ कनादिल । साहित्य मार्फत् ज्या याना नइपिं वर्गया उत्थान यायेमाःगु खँय् बः बियादिसें मूपाहां रोहितं इज्जत दइकथंया ज्या याना वनेमाःगु कनादिल ।
सम्मानित ब्यक्तित्वतय्पाखें ज्यापु महागुथिया नायः राजभाई जकःमिं किसानया हीत यायेगु नेमकिपा व ज्यापु महागुथिया ज्याझ्वः ताःलागु खँ कनादिसें आः ख्वपय् ज्यापु महागुथिया कचा नीस्वनेत पार्टीं ग्वाहालि यायेत इनाप यानादिल । ज्याझ्वलय् सांस्कृतिक अभियन्ता भाजु पन्नारत्न महर्जनं नेपालभाषा विश्वया हे उत्कृष्ट भाषा मध्येया छगू जूगु न्ह्यथनादिसें भाषा थेंज्याःगु अमूल्य निधियात म्वाका तयेगु लागिं सांस्कृतिक अतिक्रमणपाखें समाजयात बचे याना तयेमाःगु खँय् बः बियादिल । नेमकिपाया सचिव व सांसद प्रेम सुवाल, प्रदेश सांसद सुरेन्द्रराज गोसाईं, सृजना सैंजू नापं नेपालभाषा साहित्य तःमुँज्या मूगुथिया पुलांम्ह नायः साहित्यकार भाजु आशाकुमार चिकंबञ्जारपिंसं नं थः थःगु नुगः खँ कनादीगु येँया न्हापांगु नेपालभाषा साहित्य तःमुँज्याय् पत्रकार नातिकाजी महर्जन, इन्द्रमान महर्जन, शिवप्रसाद श्रेष्ठ, एल. के. सुन्दर, मदन श्रेष्ठ नापं स्वंगू दर्जन न्हूपिं पुलांपिं साहित्यकारतय्सं साहित्य वाचन यानादीगु खः । प्रेम प्रजापति लगायतया सांस्कृतिक टोलीं भजन म्ये नं न्यंकादीगु उगु ज्याझ्वःया दथुइ दथुइ सम्मान ज्याझ्वः जूगु खः ।
नेपालभाषा साहित्य तःमुँज्या येँया नायः पूर्णनारायण डंगोलया सभापत्विय् नारायण महर्जनं न्ह्याकादीगु उगु ज्याझ्वलय् सिरपाः खड्गीं हालादीगु नेवाः म्येया लागिं नेपाल क्रान्तिकारी सांस्कृतिक संघपाखें तुल्सी डंगोलं द्धःछि तका दां सिरपा लःल्हानादिल । उगु ज्याझ्वलय् साहित्यकार, भाषाह्यःमि व आपालं स्थानीय मिसा मिजंतय् सहभागीता दुगु खः ।