प्राध्यापक माणिकलाल श्रेष्ठया लुमन्तिइ ख्वपय् कृति सार्वजनिक

कृष्ण प्रजापति    
स्रष्टा समाज नेपालं प्रा. माणिकलाल श्रेष्ठया न्हापांगु वार्षिक स्मृतिइ शुक्रवाः वय्कःया लुमन्तिइ सफू सार्वजनिक याःगु दु । सफूया सार्वजनिकरण यानादिसें नेपाल मजदुर किसान पार्टीया अध्यक्ष नारायणमान बिजुक्छेँ रोहितं प्रा. माणिकलाल श्रेष्ठ छम्ह प्राध्यापक, ब्यवहारय् मृदुभाषी, विचारय् कम्युनिष्ट व अन्तर्राष्टियवादी ब्यक्तित्व जक मखुसें वय्कः छम्ह राजनीतिक नेता, विचारक, लेखक, स्पष्ट वक्ता, थीथी देय् सहित अन्तर्राष्टिय विषयया ज्ञाता व प्रतिष्ठित नेपाली विद्धान नं जूगु खँ कनादिल । वय्कलं माणिकलाल चीनया ज्ञाता, कोरियाबिद् जक मखुसें तिब्यत चीनया अभिन्न अंग खः धइगु धारणा तयादीम्ह खः धयादिल ।
    प्रा. माणिकलाल श्रेष्ठं च्वयातःगु राष्टिय व अन्तर्राष्टिय विषयया महत्वपूर्ण लेखतय् संकलन सफू स्रष्टा समाजं पितहःगु खः । ज्याभ्वलय् प्रा. माणिकलाल श्रेष्ठया काय् मुटुरोग विशेषज्ञ मखनलाल श्रेष्ठं नेमकिपा व थः अुबुया विचाः ज्वःलाःगु खँ कनादिल । वय्कःया मेम्ह काय् सितुलाल श्रेष्ठं ख्वपय् मेडिकल कलेज चायेकल धाःसा ग्वाकालि यायेगु बचन बियादिल । श्रेष्ठया म्ह्याय्चा रमिला श्रेष्ठं नेतात देय् व जनता प्रति समर्पित जुइमाःगु खँय् बः बियादिल । स्रष्टा समाजया नायः लक्ष्मीराज जोशीया सभापतित्वय् जूगु ज्याझ्वलय् स्रष्टा समाजया दुजः रजनी जोशी व सुशीला कर्माचार्यपिंसं नं थः थःगु नुगः खँ तयादीगु खः ।