आईरक

तिर्थराज थिङ

आईरक ल्हानन् सिङपा
गिलास नाङसे गाङसल थुङमा
जम्बुलिङनोन निङपा

आईरक सोल्सी आपा म्योजी
म्योपा आईरकसे आमाता तोजी
थे म्योपा आईरक आमासे थुङ्सी
धिमला चाङ ल क्रा टुईजी

आपा,आमा चेख्खेन आहिन
बप थुङसी गफ लापा
आईरक थुङसी बैठक लापा
ज्यो ज्यो म्योजी,आले म्योजी
आपग्रेन,आमग्रेन बेनान म्योजी
आखे म्योजी,माम म्योजी
म्योजी म्योजी,बेनान म्योजी

नाम्सा बेनान म्योना लसी
आईरक चाङतेन माईतिरी निजी
माईतिरी निसी,
थे आईरकसे
पहिले केन ता म्योना लाजी

केन म्योसी स्युङमे तोजी
स्युङमे ह्राब्बा डम्फु दोजी
तिनी बेङबेङ,न्हाङगार ए बेङेबेङ
स्युङमेला गो दो जी गठ्ठला गेङ

स्हुस्हेर खापाल मन लापारी
म्योमा आईरक स्युङमेसे सोल्जी
तोर ह्वा , मर ह्वा तासी ब्रा पा
स्युङमे चार्पा बोन्बो दोजी

थेरङ लसिन जेठु म्योजी
जेठु लिच्छा,स्ह्याङपो म्योजी
म्योजी म्योजी बेनान म्योजी
ङेपा ङेङकोर बेनान म्योजी

जन्ती लामा तामाङ कल्ला
तामाङ भन्दा बामन म्योजी
ल लिच्छा छेवार म्योजी
छेवार लिच्छा,घेवा म्योजी
म्हेनिङ म्योजी,तिहार म्योजी
ह्याङला रितिथिति म्योजी
तर ङाला म्होईचेन मुला