कुतः पिकाकपाखें ख्वपय् हरिगोबिन्द भोमीया सफू ईया किचलय् पिदन

कृष्ण प्रजापति
कुतः पिकाक ख्वपया ग्वसालय् ख्वपया भक्तपुर पार्टी भेन्युइ जूगु छगू ज्याझ्वःया दथुइ हरिगोबिन्द भोमीया नेपालभाषाया चिबाखं मुना ईया किचलय् पिदन । वरिष्ठ आख्यानकार भाषाथुवा मथुरा साय्मिं उगु सफूया विमोचन यानादीगु खः । विमोचन ज्याझ्वलय् वय्कलं देसय् न्ह्यानाच्वंगु एकल भाषा नीतियात त्वथलेत न्हापां थःगु भाषां खँ ल्हायेगु, थःगु भासं च्वयेगु व ब्वनेगु निरन्तर रुपं अभ्यास यानाच्वनेमाःगु खँ कनादिल । वय्कलं सुंक च्वन धाःसा झी झन् लिउने लाइ धयादिसें थः थःगु थासं सकसिनं कुतः यायेमाः धयादिल ।
    कुतः पिकाकया कजि विमल ताम्राकारया सभापतित्वय् जूगु विमोचन ज्याझ्वलय् प्राज्ञ धु्रब मधिकर्मिं उगु सफूया समीक्षा यानादिसें मनूतय्के कमजोरी दयाच्वनी, तर उकियात न्हंकेगु निंतिं च्वमि साहित्यकारतय्सं लँ क्यना बिइमाःगु खँ कुलादिल । निबन्धकार व समालोचक पूर्ण ताम्राकारं नेवाः आन्दोलनया प्रभावं नं आपालं च्वमि लेखकत तयार जुयाच्वंगु खँ कनादिसें साहित्य सिर्जनां ताः ई तक भाषा म्वानाच्वनीगु खँ कनादिल । चिबाखं च्वमि श्याम आशां नं भिन्तुना न्वचु बियादीगु ज्याझ्वलय् च्वमि हरिगोबिन्द भोमीं असमानता नांगु विमोचित सफूपाखें छपू बाखं न्यंकादिल । ज्याझ्वलय् लुँ ध्वाखा स्वलापौया प्रकाशक विष्णुकेशरी ताम्राकारं लसकुस यानादीगु खःसा विमोचन समारोह मय्जु हसना लवजुं न्ह्याकादीगु खः ।