थौ बोडेया लाछि त्वालय् विविधभाषा साहित्य सम्मेलन

बोडे । थुगुसीया नीस्वकःगु विविधभाषा साहित्य सम्मेलन थौ बोडेया लाछि त्वालय् जुइगु जूगु दु । दँय् दसं नेपाल संवतया न्हूदँ कुन्हु मध्यपुर थिमिया थीथी त्वालय् याना वयाच्वंगु थुगु सम्मेलनया लागिं माःगु फुक्कं तयारी पूवंगु खँ ग्वसाखलकं धाःगु दु ।
थौ म्हपूजा कुन्हु सुथय् ११ ताः इलय् सम्मेलन न्ह्याइ । सम्मेलन नेपाल मजदुर किसान पार्टीया केन्द्रीय अध्यक्ष नारायणमान बिजुक्छेँ रोहित मूपाहां जुयादीगु ज्याझ्वः दु । भाषा कला व संस्कृति म्वाके, राष्टिय भावना ब्वलंके धइगु नारा थ्वयेकाः नेपाल संवतया न्हूदँ कुन्हु थ्व सम्मेलन जुइ ।
सम्मेलनया उलेज्या नीलबाराही प्याखं गणया नायः गणेश थापापाखें जुइ । ज्याझ्वलय् ग्वसाखलःया नायः सुरेन्द्र था श्रेष्ठं लसकुस यानादी । अथेहे कोषाध्यक्ष कृष्णभक्त भासिमां दाँंभरीया ल्याचाः न्ह्यब्वयादी । विविध भाषा साहित्य समाजया सल्लाहकार आशाहरि प्रजापतिं सुभाय् देछानादी । समाजया अध्यक्ष सूर्यराम था श्रेष्ठं नं भिन्तुना न्वचु बियादीगु ज्याझ्वः दु । थुगु साहित्य सम्मेलन सुरु जुइ न्ह्यः सुथय् उगु हे थासं सांस्कतिक जुलुस यानाः भिन्तुना काल बिल यायेगु ज्याझ्वः क्वछिनातःगु दु । ज्याझ्वलय् ब्वति कायेत साहित्यकार, विद्यार्थी, युवा, महिला व किसान कार्यकर्तातय्त ग्वसाखलः विविध भाषा साहित्य समाजं इनाप याःगु दु ।