ख्वपय् निक्वःगु रामशेखर लुमन्ति सिरपा मनदेवी ताम्राकारयात लःल्हात

कृष्ण प्रजापति
रामशेखर लुमन्ति दबूपाखें दँय् दसं बिइगु निक्वःगु रामशेखर लुमन्ति सिरपा चिबाखं च्वमि मनदेवी ताम्राकारयात लःल्हाःगु दु । सनिवाः ख्वपय् जूगु छगू ज्याझ्वःया दथुइ रामशेखर ग्वाहालि पुचःया नायः व हाल सिद्धिदास प्रतिष्ठानया नायः नरेन्द्रभक्त हाडां चिबाखं च्वनि मनदेवी ताम्राकारयात हनापौ लःल्हाना उगु सिरपाः बिउगु खः । नीन्याद्धः तका दां सहितया उगु सिरपाः थ्वयां न्ह्यः बिराटया नायः महेन्द्र गोपाल कर्माचार्यं कयादीगु खः । मनदेवी ताम्राकारया चिबाखं मुनाः धुफ्वः उत्कृष्ट तायेकाः थ्व सिरपा बिउगु खः । ज्याझ्वलय् मूवक्ता डा. योगेन्द्र प्रधानं च्वमि, समीक्षक व ब्वंमिपिंत नापा लाकेगु ज्या थीथी साहित्यिक संघ संस्थातय्सं यानाच्वनीगु कनादिसँे रामशेखर लुमन्ति दबूपाखें थज्याःगु बांलाःगु अवसर चूलाकेगु ह्वताः चूलाकाच्वंगु खँ कनादिल ।
    सिरपाः ल्यज्या पुचःया दुजः प्राज्ञ धु्रब मधिकर्मिं साहित्य च्वयेबलय् मौलिक खँग्वः छ्यलाः पात्रयात थःगु हे परिवेशय् कः घाये फत व थःगु हे पुलांगु रचना व कृति स्वयां बांलाक वने फत धाःसा जक साहित्यकार सफल जुइगु कनादिल । रेमित्यान्सं देय् न्ह्याकेत्यंगु अर्थविद् व योजनाबिद् धाःपिनि विरुद्ध केन्द्रीत धुफ्वः बाखं मुनाया धुफ्व नांगु बाखँ न्यंकूसें थःगु नुगः खँ कनादिम्ह पुरस्कृत ब्यक्तित्व मनदेवी ताम्राकारं थःगु साहित्यक यात्रा बारे ध्वाथुइकादीगु खः । ज्याझ्वलय् रामशेखर लमन्ति दबूया दुजः न्हुछेभक्त कवालं लसकुस यानादीगु खःसा दांभरि डा. प्रकाश सुवालं सुभाय् देछानादीगु खः । ज्याझ्वः रामशेखर लमन्ति दबूया नायः गोबिन्दमान श्रेष्ठया सभापतित्वय् जूगु खः । थुगुसी चिबाखं च्वमिपिं श्याम आशा, विद्या बहादुर बज्राचार्य, यज्ञरत्न धाख्वाः, ईश्वरीमैंया श्रेष्ठ, सुरेन्द्रलाल भुजू व मनदेवी ताम्राकारया खुगू बाखं सफूयात कयाः मूल्यांकन जूगु खः ।