हनेबहःम्ह शंखधर साख्वजू, छ हाकनं वा !

बुद्धिकुमार घो
हनेबहःम्ह शंखधर साख्वाजू,
उब्लय्
थः छम्ह व्यापारी जुया नं
छं ऋणं क्यँपिं
दुःखी गरिव जनता तय्त
ऋणमुक्त याना
थःगु नामं संवत मछ्य सें
हलिमय सुनां मयाथें
कुंकुलांमय् गन मदुथें
देया नामं संवत निःस्वन
नेपाल संवत !             ।।१।।

अयन
छं म्हगसय खं थें
छं आजु तःथें
जनता तःमि जुइ मफुत
देया उन्नति जुइ मफुत
आला झन
नेपाली जनता जक मखु
झीगु नेपाः दे हे
आपालं ऋणं क्यन
आपालं जनता
दुःख व गरिबीइ तः क्यन ! ।।२।।

उ किं छ हाकनं वा
दुःखी गरिव जनताया
दुःख ज्यँकेत वा
देया मुक्कंऋण मोचन याय्ता वा
छं स्यू हे जुइ
देशय् यक्व ह्यूपाः वल
निरंकुशता न्हंका प्रजातन्त्र वल
उकियाँ लि लोकतन्त वल
हाकनं राजतन्त्र न्हँका गणतन्त्र वल
अयनं जनताया न्हूगु दिं मवःनि
छं वहे दुःखी जनताया
न्हूगु दिं ज्वना वा !                    ।।३।।

उलिमछि द त
छं नेपल संवत निःस्वँगु
अयनं देशय् सकसिनं
नालाकाःगु मदु नि
गुलिस्याँ कुं खिनाँच्वन
थ्व वैज्ञानिक मजू
थ्व व्यवहारय् छ्यलेत
इतःमितः क्यँ
उकिं छ हाकनं वा
उकिं छ याकनं वा
नेपाल संवतया पंगः ज्यँक्यता वा
गनं छुँ इतःमितः मक्यंकेत वा ! ।।४।।

आ वये बलय् छ
छम्ह व्यापारी जुया जक मखु
तः धंगु आजु जुया वा
देशय् लिकुनाच्वंगु फुक्क कथंया
पँगःत न्हँकेफुम्ह
सशक्त धापु जुया वा
समाजवादया नेतृत्व याना
दे यात जुरूक्क ल्हने फुम्ह
महानायक जुया वा
तःधंगु इच्छाशक्तिंजाम्ह
युगपुरूष जुया वा
हनेबहःम्ह शंखधर साख्वाजु,
छ हाकनं वा ! छ याकनं वा         !! ।।५।।
         
        ।। शुभाय् ।।
मिति ः २०७७÷०७÷१४
नेपाल सम्वत ११४० कौलाथ्व चतुर्दशि, शुक्रवाः
शुभकामना १ भिन्तुना ११
 
वाचन ः २०७८÷०६÷३१
        ख्वीक्वगु विराट नेपाल भाषा साहित्य सम्मेलन
        ने.सं. ११४१ कौलाथ्व द्वादशी, आइत वाः