पीछक्वःगु नेपालभाषा साहित्य तःमुँज्या सांस्कृतिक गुरुपिंत हनेज्या

कृष्ण प्रजापति
पीछक्वःगु नेपालभाषा साहित्य तःमुँज्या व सांस्कृतिक ब्वज्या कौलाथ्व द्धादसिकुन्हु ख्वप कलेज देक्वाचाय् सुरु जूगु दु । स्थानीय जेष्ठ नागरिक कृष्ण सितिखुं त्वादेवाय् मत च्याकाः पीछक्वःगु नेपालभाषा साहित्य तःमुँज्याया उलेज्या यानादिल । ज्याझ्वःया मूपाहां नेमकिपाया अध्यक्ष नारायणमान बिजुक्छेँ रोहितं कृषि विशेषज्ञ बाबुराजा भोमीयात नीद्धः तका दां सहित दोसल्लां न्ययेकाः हना पौ लःल्हासें हनेज्या यानादिल । अथेहे सांस्कृतिक गुरुपिं कृष्ण सितिखू, हरिभक्त सुवाल, तुल्सी शाही, न्हुछेकुमार अवाल, हरिराम सुवाल व कृष्णप्रसाद दथेपुथेयात म्हतिं झिद्धः तका दां लिसें दोसल्लां न्ययेकाः हनापौ देछासें हनेज्या याःगु खः ।
ज्याझ्वलय् ख्वप नगरपालिकाया मेयर सुनिल प्रजापतिं पश्चिमी देय्या ग्वाहालि शर्त मदयेकं मवइगु खँ कनादिसें अमेरिकी ग्वाहालिया नामं वःगु एमसीसी सम्झौतां नेपाःया सार्वभौमिकताय् हे घाः लाइगु व अमेरिकी साम्राज्यवाद व भारतीय विस्तारवादया मातहतय् नेपाःयात तइगु कनादिल । सिमाविद् बुद्धिनारायण श्रेष्ठ, वरिष्ठ अधिवक्ता कृष्णप्रसाद भण्डारी, डा. शम्भू पहाडी, प्रा. डा. पुरुषोत्तमलोचन श्रेष्ठ, पुलांम्ह न्यायाधीस गौरीबहादुर कार्की, नेपाली सेनाया पुलांम्ह जर्नेल डा. प्रेमसिंह बस्नेत, धुलिखेल अस्पताल प्रमुख डा. राजेन्द्र कोजू, मृगोला रोग विशेषज्ञ डा. पुकारचन्द्र श्रेष्ठ, डा. बीरेन्द्रकाजी कायस्थ, स्त्री रोग विशेषज्ञ डा. सानुमैयां श्रेष्ठ व प्रमखु जिल्ला अधिकारी मय््जु रुद्रादेवी शर्मापिसं थः थःगु नुगः खँ कनादिल । राजेश हाडां लसकुस म्ये न्यंकादीगु ज्याझ्वलय् दथुइ दथुइ थीथी खलः पुचःपाखें म्ये न्यंकादीगु खःसा न्वचुया दथुइ दथुइ रचना बचन नं जूगु खः ।
विश्वमोहन जोशीया सभापतित्वय् जूगु न्हापांगु दिंया ज्याझ्वलय् मूगुथिपाखें आशाकुमार चिकंबञ्जार व ग्वसाखलःपाखें नायः गणेशराम थुसां थः थःगु मन्तुना खँ न्यंकादीगु खः । थौंया मुँज्याय् वरिष्ठ पत्रकार भैरव रिसाल, वरिष्ठ इन्जिनियर राजदास श्रेष्ठ, डा. ऋषिकेशनारायण श्रेष्ठ, रतन भण्डारी, जीवनीकार नरेन्द्र प्रसाईं, ख्वपया पुलांम्ह एसपी नारायणप्रसाद आचार्यपिसं थः थःगु न्वचु तयादीगु खःसा इन्दीरा प्रसाईं, जनकावि चन्द्रबहादुर उलेक, दामोदर सुवाल, सूर्यप्रसाद लाकौल, धनमान श्रेष्ठपिसं च्वसु ब्वना न्यंकादीगु खः । जनता म्वासा भाषा म्वाइ धइगु नारा थ्वयेकाः दँय् दसं कौलाथ्व द्धादशि व त्रयोदशी निन्हुयंकं थ्व ज्याझ्वः मदिकं न्ह्यानाच्वंगु दु । तःमुँज्याय् पाठ जूगु उत्कृष्ट रचनायात ल्ययाः नेमकिपाया अध्यक्ष नारायणमान बिजुक्छेँ रोहितं थौं त्रयोदशीकुन्हु सिरपा लःल्हानादी ।