जातीय स्वतन्त्रतायात क्वत्यलाः राष्टया उत्थान जुइ फइमखु

कृष्ण प्रजापति
जातीय स्वतन्त्रतायात क्वत्यलाः राष्टया उत्थान जुइ फइमखु धइगु नारा थ्वयेकाः अजिम पार्टी महल बाराही पीठय् ख्वीक्वःगु बिराट नेपालभाषा साहित्य सम्मेलन जुल । कवयित्री प्रतिसरा साय्मिं त्वाःदेवाय् मत च्याकाः सम्मेलनया उलेज्या यानादीगु खः । बिराटया नायः महेन्द्रगोपाल कर्माचार्यया सभापतित्वय् जूगु सम्मेलनय् येँ देय् म्हसीका पाठ्य सामग्री तयार यानाः येँ महानगरपालिकां नेपालभाषाया माध्यमं थःपिनि लागाय् अनिवार्य रुपं नेपालभाषा विषय पठन पाठनया ब्यवस्था याःगु ज्वःमदुगु योगदानया निंतिं सम्मान याःगु खः । बिराटया पुलांम्ह नायः व सल्लाहकार डा. योगेन्द्र प्रधानं दोसल्लां न्ययेकाः नायः महेन्द्रगोपाल कर्माचार्य व मूपाहां प्रतिसरा साय्मिं हनापौ लःल्हानादिल ।
    ज्याझ्वलय् सम्मानित ब्यक्तित्व येँ महानगरपालिकाया मेयर विद्यासुन्दर शाक्यं राज्यं हे यायेमाःगु चिकिचाधंगु ज्या जकं थःपिसं यानागु खँ कनादिसें भाषा, जातिया सवालय् सुरुं छुं यायेत तसकं हे थाकुइगु तर बुलुहुँ लँ चाला वनेवं धाःसा अज्याःगु ज्या स्वर्तस्फूर्त रुपं जूवनीगु कनादिल । वय्कलं नेपाल संवतया आन्दोलन थःपिसं पार्टीगत रुपं सुरु यानागु इलय् छुं नं मखुथें खःथें मखुथें च्वंगु तर थौं राष्टपति भवन सितल निवास, मन्त्री क्वाटर व बालुवाटार नापं थीथी पार्टी व निकायय् तकं नेपाल संवतयात कयाः जलपान लगायतया ज्या जुयाच्वंगु दसु न्ह्यब्वयादिल ।
    नेपालभाषा विषय कयाः एम. ए. तगिमय् उत्कृष्ट ल्याः हयाः पास यानादीम्ह प्रजित शाक्य व एसइइ परीक्षाय् नेपालभाषाय् दक्कलय् अप्वः ल्याः हयाः पास यानादीम्ह सदीक्षा महर्जनयात मध्यपुर थिमि नगरपालिकाया मेयर मदनसुन्दर श्रेष्ठं दोसल्लां न्ययेकाः हनेज्या यानादिल । उगु हे ज्याझ्वलय् बिराटया भवन दनेत तुल्सीराम श्रेष्ठपाखें स्वंगू लाख तका व संघरत्न शाक्यपाखें छगू लाख तका दां लःल्हाःगु खः । मूपाहां थःम्हं च्वयादीगु पुलांगु कविता लुमन्तिया अगिंमथ ब्वना न्यंकादीगु सम्मेलनय् जजुकाजी रंजित व सत्यनारायण मानन्धरपिसं म्ये न्यंकादीगु खःसा गायक अमरराज शर्मा, बद्री बेदना, रिना तुलातर, बुद्धिकुमार घों, अगिब बनेपाली, सुरेन्द्रलाल भुजू लगायतं थः थःगु रचना ब्वना न्यंकादीगु खः । बिराटया ख्वाःपौ ह्याउँबालाया न्हूगु ल्याः नं विमोचन जूगु ज्याझ्वलय् बिराटया ज्यासना पुचःया दुजः बाबुकाजी सुवालया गांगु सिमा नांगु चिबाखं मुनाः नं विमोचन याःगु खः ।