पेट्रोलियम मूल्यवृद्धिविरुद्ध माओवादीको आपत्ति, संघर्षको चेतावनी

काठमाडौँ — नेपाल कम्युनिस्ट पार्टी (माओवादी) ले पेट्रोलियम पदार्थमा भएको मूल्यवृद्धिप्रति गम्भीर आपत्ति जनाउँदै सरकारलाई तत्काल निर्णय फिर्ता लिन माग गरेको छ।

पार्टीको केन्द्रीय समितिले जारी गरेको प्रेस विज्ञप्तिमा पेट्रोल, डिजेल र ग्यासको मूल्य बढाउँदा जनताको दैनिक जीवन अत्यन्त कष्टकर बनेको उल्लेख गरिएको छ। हालै नेपाल आयल निगम ले पेट्रोलमा प्रतिलिटर १७ रुपैयाँ र डिजेल/मट्टितेलमा २५ रुपैयाँसम्म मूल्य वृद्धि गरेको छ ।

विज्ञप्तिमा मूल्यवृद्धिले गरिब, मजदुर, विद्यार्थी तथा सर्वसाधारणलाई प्रत्यक्ष असर परेको उल्लेख गर्दै यस्तो निर्णय तत्काल फिर्ता लिनुपर्ने माग गरिएको छ। साथै, पार्टीले पेट्रोलियम पदार्थसँगै ग्यास र निर्माण सामग्रीको मूल्यसमेत बढेकाले समग्र अर्थतन्त्रमा दबाब परेको जनाएको छ।

माओवादीले चेतावनी दिँदै यदि मूल्यवृद्धि फिर्ता नगरिए देशव्यापी संघर्षका कार्यक्रम सार्वजनिक गर्न बाध्य हुने उल्लेख गरेको छ। त्यस्तै, पार्टीले विद्यार्थी र किसानका लागि सहुलियत दिन तथा पेट्रोलियम पदार्थमा कर छुटको व्यवस्था गर्न सरकारसँग माग गरेको छ।

विज्ञप्तिको अन्त्यमा “जनताको जीवन सहज बनाउन सरकार गम्भीर बन्नुपर्छ” भन्दै आन्दोलनको संकेतसमेत दिइएको छ।