भक्तपुरमा पहिलो ‘इसान फन फिएस्टा’ भव्य रूपमा सम्पन्न

भक्तपुर । संस्थागत विद्यालय संघ नेपाल (इसान) भक्तपुर जिल्ला समितिको आयोजनामा पहिलो पटक (इसान फन फिएस्टा) कार्यक्रम उत्साहपूर्वक सम्पन्न भएको छ । बालबालिकाको सर्वाङ्गीण विकास, खेलकुदप्रतिको रुचि र आपसी सद्भाव अभिवृद्धि गर्ने उद्देश्यसहित आयोजना गरिएको कार्यक्रम भक्तपुरको ऐतिहासिक तौमढी स्क्वायर र शहीदस्मृति खेलमैदानमा सञ्चालन गरिएको थियो ।
कार्यक्रमको उदघाटन भक्तपुर नगरपालिकाका उपप्रमुख रजनी जोशीले रंगीन बलुन उडाएर गर्नुभएको थियो । उदघाटन समारोहमा उपप्रमुख जोशीसँगै इसान केन्द्रीय अध्यक्ष प्रेमजन थापा, केन्द्रीय कोषाध्यक्ष उकेश कवां तथा आयोजक समितिका अध्यक्ष कृष्णराम त्वनाबासुले मन्तव्य राख्दै बालमैत्री कार्यक्रमहरूले विद्यार्थीको शारीरिक, मानसिक र सामाजिक विकासमा महत्वपूर्ण भूमिका खेल्ने धारणा व्यक्त गर्नुभयो ।
इसान फन फिएस्टामा भक्तपुर जिल्लाका १९ वटा संस्थागत विद्यालयहरु सहभागी भएका थिए । प्रत्येक विद्यालयबाट जुनियर केजी र सिनियर केजी तहका ८÷८ जना गरी १६ जना विद्यार्थीहरु सहभागी भएका थिए भने सम्पूर्ण विद्यालयबाट ४ जना शिक्षकहरु कार्यक्रम व्यवस्थापन तथा सहजीकरणमा संलग्न रहेका थिए । कार्यक्रमको शुभारम्भसंगै तौमढी स्क्वायरमा विद्यार्थीहरूले आकर्षक सामूहिक नृत्य     (मास डान्स) र सामूहिक पीटी अभ्यास (मास पीटी एक्सरसाइज) प्रस्तुत गरेका थिए । त्यसपछि तौमढी स्क्वायरबाट भक्तपुर दरबार स्क्वायर हुँदै शहीदस्मृति खेलमैदानसम्म ¥याली निकालिएको थियो, जसले कार्यक्रम उत्सवमय बनाएको थियो ।
शहीदस्मृति खेलमैदानमा पुगेपछि बालबालिकाका लागि ८ प्रकारका विभिन्न खेल गतिविधि सञ्चालन गरिएको थियो । खेलमार्फत सिकाइ, सहकार्य र अनुशासनको अभ्यास गराउने उद्देश्यले खेलहरू आयोजना गरिएको आयोजक समितिका अध्यक्ष कृष्ण राम त्वानाबासूले जनाएको छ ।
कार्यक्रमको समापन समारोहमा बागमती प्रदेश सभाका सदस्य सुरेन्द्र गोसाईं प्रमुख अतिथिका रूपमा सहभागी हुनुभएको थियो । समापन समारोहमा मन्तव्य राख्दै गोसाईंले यस्ता कार्यक्रमहरूले प्रारम्भिक तहका बालबालिकामा आत्मविश्वास, नेतृत्व र खेलभावना विकास गर्न सहयोग पुग्ने बताउनुभयो । समापन समारोहमा आयोजक समितिका अध्यक्ष कृष्णराम त्वनाबासुले कार्यक्रम सफल बनाउन सहयोग गर्ने सबैलाई धन्यवाद व्यक्त गर्नुभयो ।
कार्यक्रममा सहभागी सबै विद्यालय र विद्यार्थीहरूलाई ट्रफी, मेडल तथा सहभागिताको प्रमाणपत्र प्रदान गरिएको थियो । इसान भक्तपुर जिल्ला समितिले आगामी दिनमा पनि यस्ता सिर्जनात्मक, शैक्षिक तथा खेलकुदमूलक कार्यक्रमहरूलाई निरन्तरता दिने प्रतिबद्धता जनाएको छ ।