साःकोलां ख्पय् भक्तपुर जिल्लाया ७ क्वगु पलिस्था बुदिं हन

थौं न्हिल्याः ने.सं.११४६ थिंलाथ्व एकादशी, २०८२ मंसिर १५ गते सोमबार, नेपाल राष्ट्रिय ज्ञानमाला संघ अन्तर्गत भक्तपुर जिल्ला उपसमितिया "न्हेक्वगु पलिस्था बुदिं हनाः ज्याझ्वः" ख्वपया साःक‍ोलांया कुथुसाःलय् तथागत ज्ञानमाला भजन ख्वपया व्यवस्थापनय् क्वचाल । ज्याझ्वः त्रि.वि. बौद्ध बौद्ध अध्ययन विभागया उप-प्राध्यापक डा. पुष्परत्न शाक्यया मूःपाहाः सुई ज्याझ्वः उलेज्याः याना दिसें बुद्धया शिक्षा पालि भाषा नापं संस्कृत, चाईनिज, तिब्बती, नेपालभाषा लगायत विश्वया थी थी भाषं प्रचारप्रसार जुया च्वंगु बांलागु जुया च्वगु कना दिल, नापं भाषा न्ह्यागु भाषा जुसां धर्म थुईका जीवनय् छ्यलेमागु धया दिल । अथेहे विशेष पाहाँ बौद्ध विद्वान नापं म.थि.न.पा. वडा. नं.७ या वडाध्यक्ष कृष्णकुमार प्रजापतिजुं थौंया दिं जनवरी फस्ट खड्ग सम्सेर व कनिङ्गम १४० वर्ष न्ह्यः अशोक स्तम्भ पतालगय् जुगुलिं बुद्ध नेपालय् बुगु पतालगय् जुल धयादिल नापं भिन्तुुना बिया दिल । अथेहे राष्ट्रिय ज्ञानमाला संघ, नेपालया केद्रिय सदस्य व ख्वपया संस्थापक संयोजक पुण्यरत्न शाक्यं थ्वहे वईगु २०८२ पुसया २६,२७ व २८ पोखराय् जुई त्यंगु "एघारौं राष्ट्रिय ज्ञानमाला सम्मेलन"य् ब्वति कया "बाह्रौं राष्ट्रिय ज्ञानमनला सम्मेलन " ख्वपय् यायेत पाःब्व कयाहय् मागु कना दिल । ज्याःझ्वय् साःकोलां दाफा खलःया नायो धनबहादुर मानन्धर व तथागत ज्ञानमाला भजन खल:या सल्लाहकार हेलबहादुर मानन्धर,व श्यामकृष्ण डंगोल पिसं भिन्तुना न्वचु तया दिल । ज्यझ्व: राष्ट्रिय ज्ञानमाला संघ,नेपाल अन्तर्गत भक्तपुर जिल्ला उपसमितिया संयोजक गौतम बज्राचार्य या सभापतित्वय् लसकुस न्वचु सह-संयोजक तुल्सीकाजी मानन्धरं याना दिगु खसा सभापति गौतम बज्राचार्यं सुभाय् दिगु ख । ज्याझ्वः जुई न्ह्यः करिब २ घण्टा, निघौ थी थी भजन खलः पाखें ज्ञानमाला भजन न्ह्यःब्वगु ख: । ज्याझ्वय् न्हुगु पद्मपाणी लोकेश्वर ज्ञानमाला भजन खलः या अध्यक्ष राकेश बज्राचार्यया लसकुस यागु जुल । ज्याझ्वः पंचशील प्रार्थनां न्ह्याका पुण्यानुमोदन याना क्वचाय् कुगु ख ।