५४ जनेजी पक्राउः एकीकृत समाजवादीद्धारा प्रधानमन्त्री र गृहमन्त्रीको राजीनामा माग

काठमाडौँ । सामाजिक सञ्जालमाथिको प्रतिबन्ध र भ्रष्टाचारको विरुद्धमा प्रदर्शनमा उत्रिएका जेनजी समूहका ५४ जनालाई प्रहरीले पक्राउ गरेको छ । प्रदर्शनस्थलमा उच्छृङ्खल गतिविधि गर्ने ५४ जनालाई पक्राउ गरिएको जिल्ला प्रहरी परिसर काठमाडौँका एसपी अपिल बोहराले रातोपाटीलाई बताए ।
युवा विद्यार्थीहरूले सामाजिक सञ्जालमा ‘नेपो बेवी’ ट्रेन्ड चलाएर प्रदर्शनमा सहभागी हुन आह्वान गरेका थिए । ‘नेपो बेवी’ ट्रेन्ड अन्तर्गत उनीहरुले नेताका छोराछोरीलाई निशाना बनाएका हुन् ।
काठमाडौँको बानेश्वर क्षेत्रमा भएको प्रदर्शनमा ४ सय ५३  जना घाइते भए । अहिलेसम्म १७ जनाको मृत्यु भएको उपत्यका प्रहरी कार्यालयका एसएसपी शेखर खनालले रातोपाटीलाई बताए । ट्रमा सेन्टरमा ८ जना, टिचिङमा १ जना, सिभिल अस्पतालमा ३ जना, केएमसी अस्पतालमा २ जना र एभरेष्ट हस्पिटलमा ३ जनाको मृत्यु भएको खनालले जानकारी दिए ।
प्रदर्शनको सुरक्षामा खटिएका १७८ जना प्रहरी घाइते भएका छन् । सशस्त्र प्रहरीतर्फ ९ जना घाइते भएका छन् ।प्रदर्शनको फोटो खिच्ने क्रममा दुई जना पत्रकार घाइते भएका छन् । प्रदर्शनकारी तर्फ २७२ जना घाइते भएका छन् । 
यसैवीच माधवकुमार नेपाल अध्यक्ष रहेको नेपाल कम्युनिष्ट पार्टी एकीकृत समाजवादीले घटनामा दोषी सरकारका प्रधानमन्त्री केपी शर्मा ओली र गृहमन्त्री रमेश लेखकको राजीनामा मागेको छ । साथसाथै कांग्रेस बैठकले पार्टीकातर्फबाट सरकारमा रहेका प्रकाशमान सिंह र गृहमन्त्री रमेश लेखकलाई बोलाएको छ ।