होमस्टेका लागि नयाँ गन्तव्य बन्दै धादिङको चैलिङ

जयराम बिडारी ग्रामीण पर्यटन प्रवर्द्धन मञ्च (भिटोफ) नेपालद्वारा धादिङ, जिल्लाको बेनीघाट रोराङ गाउँपालिका ८ स्थित चैलिङ गाउँमा दुई दिने पर्यटकीय अध्ययन,अवलोकन तथा अभिमुखीकरण तालिम कार्यक्रम भिटोफ नेपालका अध्यक्ष शकुन्तला देवकोटा पाण्डेको नेतृत्वमा सम्पन्न भएको छ । काठमाण्डौ बाट बिहिवार करिव तीन दर्जनका संख्यामा गएका पर्यटन व्यवसायी,विषय विज्ञहरु तथा पत्रकारहरुको टोलीलाई चैलिङ सामुदायिक होमस्टेका अध्यक्ष कृष्णबहादुर श्रेष्ठ लगायत स्थानीयले फूलमाला तथा टीका लगाई स्वागत गरेका थिए । लगत्तै कालिका माध्यमिक विद्यालय एकीकृत छात्रावास उद्घाटन समारोह एवं चैलिङ नमूना पर्यटन गाउँ प्रवर्द्धन कार्यक्रममा समेत उक्त टोली सम्मिलित भएको थियो । उक्त कार्यक्रमका प्रमुख अतिथि नेकपा माओवादी केन्द्रका अध्यक्ष तथा पूर्वप्रधानमन्त्री पुष्पकमल दाहाल प्रचण्डले आफू स्वयंले पनि चुनौतिको पहाड चढेर देशको राजनीतिक एवम् सामाजिक रूपान्तरणको लागि पटक पटक जोखिम उठाएको स्मरण गराउँदै गाउँपालिका आफैँले व्यवस्थापन गर्ने गरी वडाभरिका विद्यालयलाई आवासीय सुविधासहितको एकिकृत विद्यालय बनाउने विवेकको कर्म चुनौतीपूर्ण रहेको बताए । उनले जनयुद्धकालीन समयको कठीन परिस्थितिमा परिवारको चार सदस्य गुमाउनु पर्दा पनि लक्ष्य तथा कर्तव्यपथमा निरन्तर लम्किएका वर्तमान गापा अध्यक्ष कृष्णबहादुर थपलिया ‘विवेकले’ उच्च आदर्श चरित्र निर्माण गरेको बताउँदै उनका योजना र कार्यक्रमले जनताको अपार सद्भाव र समर्थन प्राप्त गरेका कारण सहजै सफलता प्राप्त गर्ने समेत बताए । अध्यक्ष प्रचण्डले समाज विकासको आधार शिक्षा नै भएको बताउँदै विकशित देशको शिक्षामा समग्र बजेटको १०% लगानी हुने गरेको भएपनि नेपालमा तत्काल परिणाम नआउने बहानामा २% पनि लगानी नहुनु दुखद रहेको भएपनि बेनीघाट रोराङ गाउँपालिकाले क्रमभङ्ग गरेर अघि बढेकोमा खुशी व्यक्त गरे । सो समारोहमा गाउँपालिका उपाध्यक्ष टापबहादुर श्रेष्ठले स्वागत मन्तव्य राख्दै समग्र समृद्धिको सपना देख्नु र त्यसलाई पुरा गर्नका लागि सुन्य प्रतिशत बेरुजुका साथ इमान्दार प्रयास स्वरुपको कार्ययोजना बनाउने र लागू गर्ने क्रममा एकिकृत विद्यालयको अवधारणा आएको बताए । यसैगरि कार्यक्रममा गापाअध्यक्ष लगायत वाग्मती प्रदेशका पूर्व मुख्यमन्त्री सालिकराम जमकट्टेलले सम्बोधन गरेका थिए भने विद्यालयकाा छात्राहरुले स्वागत गान तथा नृत्य र गाउँ पालिका कर्मचारीहरुले समेत ‘घर हाम्रो नेपाल जाती हाम्रो नेपाली’ बोलको गीतमा आकर्षक नृत्य प्रस्तुत गरेका थिए । यसैगरी कार्यक्रमको दोस्रो दिन अर्थात् शुक्रवार बेनीघाट रोराङ गाउँपालिका तथा गाउँ पर्यटन प्रवर्धन मञ्च नेपाल (भिटोफ)को संयुक्त तत्वावधानमा पर्यटकीय अध्ययन,अवलोकन तथा अभिमुखीकरण तालीम सम्पन्न गरियो । भिटोफ नेपालका अध्यक्ष सकुन्तला पाण्डे देवकोटाको अध्यक्षता तथा नेपाल पर्यटन बोर्डका उपाध्यक्ष रामप्रसाद सापकोटा(कमल)को प्रमुख आतिथ्य तथा गापा अध्यक्ष कृष्णलाल श्रेष्ठ ‘विवेक’ लगायत प्रमुख प्रशिक्षक प्रा. डा.प्रेम शर्माको समुपस्थितिमा सम्पन्न गरिएको थियो । कार्यक्रमका प्रमुख अतिथिको भूमिकामा रहेका रामप्रसाद सापकोटा(कमल)स्थानीय संरचना तथा उत्पादनका सामग्रीको अधिकतम प्रयोगले होमस्टे सञ्चालनमा प्रभावकारी भूमिका खेल्ने बताउँदै चैलिङ होम स्टे प्रवर्धनका निम्ति ब्रोसर तयार गर्नेदेखि पर्यटन बोर्डको माध्यमबाट घुमघाममा निस्कने आन्तरिक तथा बाह्य पर्यटकहरुलाई नयाँ गन्तव्यका रुपमा चैलिङ आउन अभिप्रेरित गर्ने बताए । उक्त कार्यक्रमका विशेष अतिथि गाउँपालिकाका अध्यक्ष कृष्णबहादुर थपलिया ‘विवेक’ ले चैलिङ गाउँलाई होमस्टेको नमूना वस्तीका रुपमा परिचित गराउनका लागि अहोरात्र खटिरहेका स्थानीय सँगै पर्यटनका क्षेत्रमा कृयाशील संघ संस्था लगायतले यहाँको सुन्दर भूगोल मठमन्दिर तथा मनलाई नै आनन्दित तुल्याउने मनोरम हिमश्रृङ्खलाको दृश्यावलोकन गर्न सकिने जस्ता सकारात्मक प्रचारप्रसारको आवश्यकता रहेको बताए । उनले राजमार्ग तथा राजधानीबाट नजिकै रहेर पनि झण्डै झन्डै कर्णालको झझल्को दिने अवस्थामा बेनीघाट रोराङ रहेको बताउँदै चिउरी चेपाङ र चमेरोको पर्यायका रुपमा रहेको यस स्थानमा ग्रामीण पर्यटनको विकाशले यहााँका जनताका जनजीवन परिवर्तन गर्न सकिने बताए । यसैगरि कार्यक्रमकी अध्यक्षता गरेकी शकुन्तला देवकोटाले पछिल्लो समयमा होमस्टेका लागि विख्यात रहेको चित्लाङ जस्तै राजधानीबाट नजिकै रहेको पर्यटनको अपार सम्भावना बोकेको चैलिङले आन्तरिक तथा बाह्य पर्यटकको सेवा स्वागत र सत्कारका माध्यमबाट छिट्टै नै आमूल परिवर्तन ल्याउनेछ र त्यसका लागि पर्यटन क्षेत्र सम्बद्ध सवैले सकारात्मक प्रचार प्रसार गरिदिनु पर्ने आवश्यकतामा जोड दिइन् । उक्त अवसरमा डा.आलोक चालिसे,प्रा.डा. प्रेम शर्मा तथा भुमराज तिवारीले होमस्टे सञ्चालनका विधि प्रकृया तथा मान्यताका बारेमा आधारभूत प्रशिक्षण दिएका थिए भने कार्यक्रम पश्चात सहभागीता जनाएका होमस्टेका सञ्चालकहरु तथा प्रशिक्षकलाई अध्यक्ष देवकोटाद्रारा प्रमाणपत्र प्रदान गरिएको थियो । उक्त कार्यक्रममा भिटोफका द्वितीय उपाध्यक्ष मनहरि पौडेलद्वारा संयोजन गरिएको सो कार्यक्रममा होमस्टे सञ्चालक समितिका अध्यक्ष कृष्णबहादुर श्रेष्ठले स्वागत मन्तव्य राखेका थिए भने नेपाल तथा चिन दुवैतर्फको मोहडाबाट दुई पटक सगरमाथा आरोहण गरिसकेकी सगरमाथा आरोही ,पत्रकार तथा भिटोफकी सदस्य कल्पना महर्जनले कार्यक्रमको सहजीकरण गरेकी थिइन् ।