उदय साकोसको २८ आैं साधारणसभा सम्पन्न

भक्तपुर, असोज १९ । लिवालि ८ स्थित उदय बचत तथा ऋण सहकारी संस्थाको २८ आैं साधारणसभा जेष्ठ महिला सदस्य कृष्णलक्ष्मी प्रजापतिको प्रमुख आतिथ्यतामा वाकुपति नारायण नाै बाजा खलको सुमधुर मंगल धुनसहित उद्घाटन गरियो ।

कार्यक्रममा भक्तपुर नगरपालिका वडा नं ८ का वडाध्यक्ष कृष्णप्रसाद कोजूले संस्थाको सुरक्षा र व्यवस्थापन भन्दा नाफाको लागि संचालित सहकारीमा नातावाद हेरी विना धितो ऋण प्रवाहबाट आर्थिक तथा पारिवारिक समस्या आएको बताउँदै मानवीय र शारीरिक समस्यालाई न्यून गर्न माैलिक कृषि उत्पादनमा नयाँ पुस्तालाई अग्रसर गराउन सहकारीले आवश्यक भूमिका निभाउनपर्ने बताउनुभयो । वैदेशिक रोजगारीका कारण परिवारमा सामाजिक विचलन आएको बताउँदै उहाँले भक्तपुर नगरपालिकाले कृषकहरुको उत्पादनलाई राम्रो र गुणस्तरीय बनाउन चिस्यान केन्द्र निर्माण भइरहेको जानकारी दिनुभयो ।

भक्तपुर जिल्ला बचत तथा ऋण सहकारी संस्थाका प्रतिनिधि बिकुलाल सुवालले ऋणमा नियमानुसार छुट लिएर सदस्यले आफ्नो दायित्व बहन गर्दा समुदायमा आधारित सहकारीमा कुनै वित्तीय समस्या नअाउने बताउँदै आर्थिक क्षेत्रको तीन खम्बे नीतिमा रहेको सहकारीले पल्स विश्लेषण तालिममा अन्य सदस्यलाई पनि समावेश गर्नुपर्ने बताउनुभयो । संस्थाका अध्यक्ष तथा कार्यक्रमका सभापति रामकृष्ण प्रजापतिले जनताको बचतलाई सुरक्षित राख्न संस्थाका सबै सदस्य, संचालक तथा कर्मचारीबाट सहकारीको विधिविधान, सिद्धान्त तथा नीतिनियमलाई आत्मसात गरी कारोबार गर्नुपर्ने बताउँदै संघ, प्रदेश तथा स्थानीय तहले नियमित अनुगमन गरी सहकारी संस्थालाई सजग गराउनुपर्ने विचार व्यक्त गर्नुभयो ।  संस्थाका कोषाध्यक्ष शिवराम बोहजूले आर्थिक प्रतिवेदन, सचिव दिलप्रसाद प्रजापतिले वार्षिक प्रतिवेदन तथा लेखा सुपरिवेक्षण समितिका संयोजक विष्णुप्रसाद प्रजापतिले लेखापरीक्षणको प्रतिवेदन प्रस्तुत गरिएको उक्त कार्यक्रममा संस्थाका उपाध्यक्ष न्हुछे बहादुर प्रजापति लगायत संचालक सदस्यद्वय विना मुस्याख्व र सोहन रञ्जितले बोलेका थिए । ११ वटा मित्र सहकारीको उपस्थिति रहेको सो कार्यक्रमले एसईई उत्तीर्ण बाल सदस्यलाई निःशुल्क सदस्यता वितरण गर्ने उद्घोष गरिएको छ । चिठ्ठा तथा उपहारको व्यवस्थाले सदस्यहरूको उल्लेख्य सहभागिता रहेको उक्त कार्यक्रममा ६ जना असल ऋणी र ३६ जना एसईई उत्तीर्ण विद्यार्थीलाई उदय पदक २०८१ द्वारा सम्मान गरिएको छ ।