जेष्ठ नागरिकलाई सम्मान

मध्यपुर थिमी सेवा नै ठूलो धर्म हो, स्वार्थभन्दा माथि रहेर सेवा गरौँ भन्ने उद्देश्यका साथ मध्यपुर ठिमीमा गठन भएको रोटरी क्लब अफ मध्यपुरले आज अन्तर्राष्ट्रिय जेष्ठ नागरिक दिवसको उपलक्ष्यमा सिद्धिकाली मन्दिर परिसरमा ७० जना जेष्ठ नागरिकहरूलाई सम्मान तथा उपहार स्वरूप स्वास्थ्य सामग्री वितरण कार्यक्रम सम्पन्न गर्यो। 

सो कार्यक्रममा प्रमुख अतिथिको रुपमा मध्यपुर ठिमी नगरपालिका वडा नम्बर ६ का वडा अध्यक्ष ज्ञानदास प्रजापति रहनुभएको थियो ।कार्यक्रममा सम्मानित जेष्ठ नागरिकहरुलाई शुभकामना तथा दीर्घायुको कामना गर्दै सम्मान र उपहार वितरण कार्यक्रमको आयोजना गर्नुभएकाेमा रोटरी क्लब अफ मध्यपुरलाई प्रमुख अतिथि ज्ञानदास प्रजापतिले धन्यवाद ज्ञापन समेत गर्नुभयो। सोही कार्यक्रममा क्लबका संस्थापक अध्यक्ष सुरेन्द्रविक्रम प्रजापतिले जेष्ठ नागरिकहरूको हक, अधिकार स्थापित भएको विशेष दिनको रूपमा प्रत्येक वर्ष अक्टोबर १ का दिन अन्तर्राष्ट्रिय जेष्ठ नागरिक दिवस मनाउँदै आएको एवं ज्येष्ठ नागरिक हरू अनुभवका धरोहर भएकाले उहाँहरुले देखाएको बाटोमा र सिकाएका कुराहरू सिरोधार्य गर्दै जान सबैलाई अनुराेध गर्नुभयो क्लबका सचिव रवि प्रजापतिले सञ्चालन गर्नुभएको उक्त कार्यक्रममा सिद्धिकाली क्षेत्र विकास समितिका अध्यक्ष दिलकृष्ण प्रजापतिले रोटरी क्लब अफ मध्यपुरले स्थानीय जेष्ठ नागरिकहरूलाई सम्मान गरिदिनुभएकोमा धन्यवाद ज्ञापन गर्नुभएको थियो। रोट्री क्लब अफ मध्यपुरका पूर्व अध्यक्ष नारायण भुसालले धन्यवाद ज्ञापन गर्नुभएको उक्त कार्यक्रममा सभापतित्व क्लबका सह अध्यक्ष चन्द्र चक्रधरले गर्नुभएको थियो।