ताथलीवासीको खानेपानीको तिर्खा मेट्दै, १६ करोडको योजना चालू

भक्तपुर । भक्तपुरको चाँगुनारायण नगरपालिका–९ ताथली तथा आसपासलाई लक्षित गरी खानेपानी आयोजना निर्माण गर्ने कार्य तीब्र रुपमा अघि बढेको छ । करिब १६ करोड रुपैयाँको लागतमा सम्पन्न हुने उक्त खानेपानी आयोजनामा नेपाल सरकारको ७० प्रतिशत र जनसमुदायको ३० प्रतिशत लगानीमा निर्माण सम्पन्न हुने क्रममा छ ।
योजना अन्तर्गत संस्थाले उपभोक्तालाई धारा वितरणका साथ पानी सूचारु गर्न थालेको छ । जनसमुदायले लगानी गर्ने ३० प्रतिशत रकम उठाउन केही समय लाग्ने भएकाले नगर विकास कोषबाट ऋणसमेत लिइएको छ । संस्थाका अध्यक्ष नकुल राउतले नगर विकास कोषले २ करोड २८ लाख २८ हजार ३ सय ७९ रुपैयाँ ऋण उपलब्ध गराउनका लागि सम्झौता भइसकेको बताए । यो आयोजनाबाट ताथली र आसपासका गरी १५०० घरधुरी खानेपानीबाट लाभान्वित हुनेछन् ।
मानिसको दैनिकी र जीवनका लागि आवश्यक खानेपानी बन्दोबस्त गरी जीवनलाई सहज बनाउने सहयात्रीको रुपमा रहेको खानेपानी आयोजनाले अहिलेसम्म ५ लाख लिटरको ट्यांकी र ४ वटा डिपबोरिङ गरिसकेको छ । ‘हालैमात्र २ वटा डिप बोरिङ सकाएका छौं, हामी खानेपानी सूचारु गर्न अझ तत्परताका साथ लागिरहेका छौं ।’ संस्थाका उपाध्यक्ष एकबहादुर खत्रीले भने ।

साविक ताथली गाविसका वडा नं. ४ देखि ९ वडा सम्मका स्थानीयहरुले विगत धेरै वर्षदेखि खानेपानीको चरम समस्या भोग्दै आएका र सञ्चालनमा  आएका योजनाहरु पनि दीगो हुन नसकेको अवस्थामा खानेपानी समस्याको दीगो समाधानको उद्देश्यसहित विन्दवासिनी बृहत लिफ्ट खानेपानी जल उपभोक्ता संस्थाको जन्म भएको संस्थाका अध्यक्ष राउतको भनाइ छ । सोही उद्देश्यअनुसार काम गरिरहेको जानकारी दिँदै अधयक्ष  राउत भन्छन्, ‘वि.सं. २०७१ साल साउन २० गतेका दिन दर्ता भएको यो योजना नेपाल सरकारको २०७१ सालको रातो पुस्तिकामा उल्लेख भएर आवश्यक बजेट उपलब्ध भएको थियो । योजनाको कामका लागि ताथलीका सबै व्यक्ति, राजनीतिक दल, संघसंस्थाको सहयोग छ ।’
यो समाचार चाँगुपत्र मासिकको कार्तिक अंकमा पनि पढ्न सक्नुहुनेछ ।
उनले टोलटोलमा खानेपानी वितरण सुरु गरेर पानी वितरणको परीक्षण सुखद् रहेको बताउँदै पानी वितरण सूचारु भएसँगै उपभोक्ताबाट आएका सल्लाह, सुझाव र प्रतिक्रियालाई मनन् गरी संस्थाले उपभोक्ताहरुको खानेपानीको माग अनुसार काम गर्ने नीति तय गरेको बताए ।
संस्थाका उपाध्यक्ष खत्रीले अहिले धमाधम खानेपानीको धारा वितरण गरिरहेको जानकारी दिँदै खानेपानीको समस्यामा रहेका ताथलीवासीले यो खानेपानीले लिफ्ट प्रविधि अपनाएर फिल्टर गरिएको पानी वितरण सुरु गरेसँगै लाभ लिन थालेको जनाए । हामीले खानेपानी दिन थालेका छौं, यो सुरुवाती चरण हो, कहिँकहिँ केही केही समस्या पनि देखिएको छ, त्यसलाई हामी भरसक छिटो समाधान गर्ने क्रममा छौं ।’ उपाध्यक्ष खत्रीले भने ।