शिक्षा क्षेत्रमा सूर्यविनायक नगरपालिकाको उदाहरणीय कार्य

अधिकांश सामुदायिक विद्यालयमा प्रधानाध्यापक नियुक्तिमा विवाद र मनोमानी हुने गर्छ । तर, भक्तपुरको सूर्यविनायक नगरपालिकाले खुला प्रतिस्पर्धाका आधारमा प्रधानाध्यापकहरूको नियुक्ति गरेको छ । सामुदायिक विद्यालयमा यो अभ्यास सम्भवतः पहिलो हो । 

नगरप्रमुख बासुदेव थापाले सामुदायिक विद्यालयको गुणस्तर सुधारर्न योग्यता, क्षमता भएका व्यक्तिलाई निष्पक्ष ढंगले जिम्मेवारी दिन लागिएको बताए । ‘प्राविको शिक्षक, माविको प्रअ हुने अवस्था थियो । त्यसलाई रोक्न पनि ५ वर्षे विद्यालय सुधार योजना मूल्यांकन गरेर विद्यालयको जिम्मा दिन लागेका हौं,’ उनले भने, ‘नियुक्ति भएकाको कार्यकाल ५ वर्षको हुनेछ ।’ नियुक्त प्रअलाई संघीय सरकारले उपलब्ध गराएको बाहेक नगरपालिकाले दिँदै आएको भत्तालाई दोब्बर गरिने कार्यविधिमा उल्लेख छ ।

सूर्यविनायक नगरपालिकाले प्रतिस्पर्धीसँग विद्यालय विकास प्रस्ताव, शिक्षण गर्ने विषयको तीन वर्षको नतिजा विवरण, विद्यालय नेतृत्वसम्बन्धी अनुभव माग गरेको थियो । शैक्षिक योग्यता, तालिम, अध्यापन नतिजालाई ३० पूर्णांक तोकिएको थियो । विद्यालय विकास प्रस्तावका लागि ३०, प्रस्तुतीकरण र छलफलमा २० र अन्तर्वार्तामा २० गरी एक सय पूर्णांक कायम गरिएको थियो । प्रस्तावको मूल्यांकन गर्ने विज्ञ टोलीमा शिक्षाविद्हरू मनप्रसाद वाग्ले, विनय कुसियत, विष्णु कार्की, सुशासन आचार्य र प्रमिला राजभण्डारी सदस्य थिए ।