कीर्तिपुर सिंगिङ आइडल ११४२ य् च्याम्ह आउट, झिम्ह टप १०

किपू नगरपालिकाया ग्वसालय् न्ह्यानाच्वंगु कीर्तिपुर सिंगिङ आइडल ११४२ या निगूगु चरणया कासा किपूया २ वडाय् च्वंगु नेपालभाषा एकेदेमिया हलय् क्वचाःगु दु । १८ म्ह कासामिपिन्सं कराओके म्यूजिकय् म्ये हालाः उगु निगूगु चरणया ज्याझ्वः क्वचाःगु खः । १८ म्ह कासामिमध्ये उगु निगूगु चरणं झिम्ह कासामि टप १० कथं ल्यइसा च्याम्ह कासामि आउट जुइगु जानकारी ग्वसाः खलः कीर्तिपुर नगरपालिकां ब्यूगु दु । उगु कीर्तिपुर सिंगिङ आइडल ११४२ कासाय् १९ म्ह कासामिपिन्सं ब्वति काःगु खःसा छम्ह कासामि थःगु ज्या विशेषं विदेश वनेमाःगुलिं उम्ह कासामि विदेश वनेधुंकलसा आः १८ म्ह कासामि जक दुथ्याःगु खः । थथे विदेश वंम्ह कासामि प्रतियोगी ल्याः ३ या किपू नपा ४ वडा पालुबःया यज्जु महर्जन खः ।
    
किपू नगरपालिकाया १ निसें १० वडा दुनेया १५ दँ निसें ३० दँ उमेर समूहया प्रतिभापिनिगु दथुइ धेंधेंबल्ला जुयाच्वंगु उगु कीर्तिपुर सिंगिङ आइडल ११४२ य् प्रशान्त सुवेदी, जोन महर्जन, नसना महर्जन, सनिश महर्जन, दिवेन बज्राचार्य, रसिक मालाकार, अतुल मानन्धर, संयोग बस्नेत, निकेश मानन्धर, नफिसा मर्हन, रुपा शाही, रितिशा महर्जन, समृद्धि महर्जन, सुदेश महर्जन, निर्जल महर्जन, कृपा बाँस्कोटा, एकता महर्जन व स्नेहा नकःमिपिन्सं ब्वति कयाच्वंगु दु । आः निगूगु चरण क्वचायेधुंकूगु दुसा निगूगु चरणया रिजल्ट वये ल्यंदनिसा १८ म्ह कासामिमध्ये च्याम्ह आउट जुइगु जूगुलिं कासामिपिनिगु व संगीतह्यःििमिपनिगु नुगलय् सु सु आउट जुइगु व सु सु टप १० य् थ्यनीगु खः धैगु खँय् चर्चा परिचर्चा जुयाच्वंगु दु । निगूगु चरणया ज्याझ्वलय् १८ म्ह कासामिपिन्सं अतिकं बांलाक्क म्ये हाःगु निर्णायक मण्डलया पुचलं धाःगु दु । निर्णायक मण्डलया छम्ह दुजलं १८ म्ह दथुइ निर्णय यायेत अतिकं थाकूगु खँया जानकारी नं ब्यूगु दु ।
    
निर्णायक मण्डलय् किपूया ११ म्ह संगीत हस्तीपिं च्वनादीगु खः । निर्णायक मण्डलय् किपूया पुलांम्ह नांजाःम्ह संगीतकःमि ज्ञानेश्वर निभाः, संगीतकार तीर्थ माली, कुटुम्ब ब्याण्डया जःपिं राजु महर्जन व रुविन श्रेष्ठ, पुलांम्ह तबलाबादक न्हुच्छे दर्शन, लोकंह्वाःपिं म्येहालामिपिं सतीश महर्जन, रत्नशोभा महर्जन व दिपा महर्जन, पुलांम्ह नांजाःम्ह गितारवादक संगीतकार सन्तोष महर्जन, संगीतकःमि कृष्णहरी महर्जन अथेहे, नांजाःम्ह संगीतकःमि हरिशरण सायमि च्वनादीगु खः । थुगु निगूगु चरणया कासा धुंकाः आः टप १० दथुइ दकले लिपांगु चरण फाइनल कासा जुइगु जूगु दु । फाइनल कासाय् टप १० कासामिपिन्सं लाईभ म्यूजिकय् थःगु म्ये न्ह्यब्वयेमाःगु जानकारी ग्वसाः खलः किपू नगरपालिकां ब्यूगु दुसा फाइनल कासा पुस महिनाया न्हापांगु वालय् जुइगु जानकारी नं ब्यूगु दु ।
    
अथेहे, फाइनल कासा न्ह्यः टप १० कासामिपिन्त थीथी वडाया दबुली यंकाः प्रचारात्मक ज्याझ्वः कथं सांगितिक ब्वज्या याकेगु नं ग्वसाः ग्वयातःगु दुसा कासामिपिन्त थीथी रिकर्डिङ स्टुडियो चाःहिइकेगु ज्याझ्वः नं दूगु जानकारी आइडल कजि हरिशरण सायमिं जानकारी बियादीगु दु । कीर्तिपुर सिंगिङ आइडल ११४२ कासाय् न्हाप लाःम्हेसित ५०,०००, ल्यू लाःम्हेसित ४०,००० व लियांल्यू लाःम्हेसित ३०,००० तका दां सिरपाःलिसें ट्रफी, मेडल व थीथी सिरपाः लःल्हायेगु ग्वसाः दूगु जानकारी ग्वसाः खलः कीर्तिपुर नगरपालिकां जानकारी ब्यूगु दु ।
    
किपू नगरपालिकाया मेयर व उपमेयर विशेष हुनिं उपस्थित जुइमफूगुलिं वय्कःपिनिगु भिडियोपाखें भिंतुना हसना न्ह्यब्वःगु उगु निगूगु राउण्डया ज्याझ्वलय् किपू नगरपालिकाया प्रमुख कार्यकारी अधिकृत कृष्णप्रसाद सापकोटा उपस्थित जुयादीगु खःसा नगरपालिकाया प्रमुख लेखा शाखा अधिकृत प्रविणजंग शाही पाहाँ कथं उपस्थित जुयादीगु खः । नेपाःया राष्ट्रिय गान, नेवाः राष्ट्रिय गानलिसें ज्याझ्वःया प्रोग्राम आइडी थ्वयेकाः न्ह्याःगु उगु ज्याझ्वः कीर्तिपुर सिंगिङ आइडल ११४२ या दुजः ललेन्द्र शाक्यं न्ह्याकादीगु खः ।