भक्तपुर बचतया नीन्यादँ क्यंगु रजत महोत्सब जुल

कृष्ण प्रजापति
नेपाल मजदुर किसान पार्टीया केन्द्रीय अध्यक्ष नारायणमान बिजुक्छेँ रोहितं सरकारया भरय् जक ज्या यायेमजिउगु खँ कनादीगु दु । भक्तपुर बचत तथा ऋण सहारी संस्थाया नीन्यादँ क्यंगु रजत महोत्सबया लसताय् सुजःद्यःमरः त्वालय् जूगु विशेष ज्याझ्वलय् उगु संस्थाया रजत दँ रंगिन लुमन्ति पौया विमोचन यानादिसें वय्कलं उगु खँ कनादीगु खः । ज्याझ्वलय् वय्कलं पूँजीवादी सदन मोष्ट वान्टेड मनूतय्गु सुलेगु थाय् थें जुयाच्वंगु न्ह्यथनादिसें कला संस्कृतियात नं न्हूगु पुस्तां पूँजी कथं विकास याना उकिं समाज सेवा याये फयेकेमाःगु सुझाब बियादिल ।
    बागमती प्रदेशया सांसद सृजना सैंजूं एमसीसी संकटया बाकस जूगु खँ कनादिसें चीनयात कयेकेत नेपाःया ब्वहलय् दिकातःगु न्यय्गू करोड अमेरिकी डलरया बन्दूक हे एमसीसी खः धयादिल । विशेष अदालतया पुलांम्ह न्यायाधीस गौरीबहादुर कार्कीं सहकार बारे संघीय सरकार अनभिज्ञ जूगु कनादिसें ख्वपया थीथी संस्कृति व सम्पदायात नगरपालिकां हाकनं छक्वः पुनस्र्थापित यायेगु पहल यायेमाःगु खँ कनादिल । रजत महोत्सब ज्याझ्वः संस्थाया अध्यक्ष बलराम प्रजापतिया सभापतित्वय् जूगु खः । उगु ज्याझ्वलय् नेमकिपाया केन्द्रीय कोषाध्यक्ष शिक्षासेवी मोहनप्रसाद प्रजापति, ९ वडा अध्यक्ष रविन्द्र ज्याख्वः, शहीद धर्मभक्त हृदयरोग केन्द्रया प्रमुख डा. पुकारचन्द्र श्रेष्ठ लगायतया वक्तातय्सं न्ववानादीगु खः ।
    ज्याझ्वलय् मूपाहां रोहितं पुलांम्ह सफाई मजदुर लक्ष्मीभक्त कोजू, दान्यहिरा विज्ञान प्रविधि पुरस्कारं विभूषित शिल्पी ब्यक्तित्व जगतबीर शिल्पकार व कोरोनाया इलय् लाश ब्यवस्थापनय् योगदान यानादीम्ह ८ वडाया राजेश गाईजूपिंत म्हतिं झिंन्याद्धः तका दां सहित सम्मान यानादिल । अथेहे संस्थाया ग्वसालय् जूगु कसिमला पाँय्चा कासाय् न्हाप, लिउ, लियां लिउ व हःपाः लाकादीपिं श्याम प्रजापति, सेते कुस्मा, लक्ष्मीभक्त कोजू व शिवशंकर भुजूयात छसिकथं न्याद्धः, स्वद्धः, निद्धः व द्धःछि दां सहित दसि पौ लःल्हाःगु खः । ज्याझ्वलय् न्वकू निर्मल प्रजापतिं लसकुस यानादीगु खः ।