हलिं नेवाः गुथिया झिंस्वक्वःगु तःमुँज्या फागुनया २६ गते बुटवलय् जुइगु

कृष्ण प्रजापति
हलिं नेवाः गुथिया झिंस्वक्वःगु तःमुँज्या थ्वहे वइगु चिल्लाथ्व अष्टमि फागुन २६ गते बिहिवाः होलीकारम्भ अर्थात् हालिया लागिं चीर स्वाइगु दिं लाकाः बुटवलय् जुइगु जूगु दु । तिलतोमा मिसा पुचःया आह्वानय् अन थुगुसी उगु तःमुँज्याया ग्वसाग्वःगु खः । थ्व ज्याझ्वः ताःलाकेत थीथी कवः व कचायात केन्द्रं आह्वान याःगु दु । थ्वहे वइगु पुसया दुने केन्द्रीय परिषद बैठक च्वनाः अन तःमुँज्या यायेगु क्वछिगु दु । ख्वपय् थौं जूगु हलिं नेवाः गुथिया केन्द्रीय बैठकं बुटबलय् तःमुँज्याया लागिं थीथी कथंया तयारी याना वनेगु खँ क्वछिउगु दु ।
    नियमित रुपं बिक्रम संवतया महिनाया २५ गते च्वना वयाच्वंगु थ्व बैठक थुगुसी ख्वपय् च्वंगु खः । हलिं नेवाः गुथि ख्वप कचाया ब्वनाय् जूगु केन्द्रीय बैठकय् हलिं नेवाः गुथिया केन्द्रीय अध्यक्ष जुजुमान श्रेष्ठं थःपिंके कचा मचा हे शक्तिशाली जुयाच्वंगु कारणं केन्द्रया स्वयां थीथी कचाया ज्याय् विचार विमर्श यायेगु हे जक थःपिनि ज्या जुयाच्वंगु खँ कनादिल । वय्कलं झिगू बुँदे सहलहया झ्वलय् थीथी योजना व परियोजनायात सुझाब बियादिसें कचामचा बल्लासा हे जक हलिं नेवाः गुथि बल्लाइगु खँ कनादिल । हलि नेवाः गुथिया केन्द्रीय सचिव सुरेश साँय्जुं आः तकं हलिं नेवाः गुथिं यानाच्वंगु थीथी गतिविधिया बारे ध्वाथुइकादीगु खः । हलिं नेवाः गुथि ख्वप कचाया नायः पूर्णभक्त दुवालं लसकुस यानाः न्ह्याकूगु बैठकय् सुजःद्यः मरः कचाःया नायः, न्वकू नापं दतात्रय कचाया दुजःत दुथ्याःगु खः ।