रत्न राज्यलक्ष्मी क्याम्पसय् एम.ए.तगिया रि–इन्ट्रान्स कार्तिक २६ गतेतक थप

कृष्ण प्रजापति
येँया रत्न राज्यलक्ष्मी क्याम्पसय् नेपालभाषा एम.ए. तहया भर्नाया नितिं  रि—इन्ट्रान्स वइगु कार्तिक २६ गतेतकक थप याःगु दु ।
नेपालभाषाया प्राध्यापक डा. चन्द्रमान बज्राचार्यया कथं  आःतक नेवाः नुगः दुम्ह शंकर थापा नापं यानाः एम.ए. नेपालभाषा आखः ब्वनेत रि–इन्ट्रान्स बिइवं नेपालभाषा ब्वनीपिं विद्यार्थीपिनिगु ल्याः १५ म्ह थ्यंगु दु ।   भर्ना याइपिं ब्वनामि विद्यार्थीपिनिगु ल्याः अप्वइगु जुयाः रि–इन्ट्रान्स यायेत क्याम्पस प्रशासनयात विशेष इनाप यानाः  ई थप याःगु हुनिं नेपालभाषा एम.ए. तगिमय् आखः ब्वनेत नुगः क्वसाःपिंसं याकनं स्वापू तयादिइत इनाप याःगु दु ।
नेवाः विद्यार्थी युनियनया छ्याञ्जे (सचिव) प्रशान्त डंगोलया कथं  वि.सं. २०७३ सालपाखे थुगु क्याम्पसय् छम्ह हे नेपालभाषा ब्वनामिपिं मदुगु व आः उगु क्याम्पसय् सकल मां भाय् ह्यःमि, न्यायप्रेमी, शिक्षाप्रेमी ब्वनामिपिलिसें सकलसिगु ग्वाहालिं अभियान ताःलाःगु न्ह्यथनादिल ।   थ्यंमथ्यं निदँतक ताः ईतक संघर्ष धुंकाः तिनि नेपालभाषा एम.ए. अभियान ताःलाःगु धयागु सकल नेवाःतयगु नितिं सफलता जूगु हुनिं नेपालभाषा एम.ए. तह भर्ना अभियान सशक्त ढंग न्ह्याकेगु खँय् ग्वाहालि यायेत नेवाः विद्यार्थी युनियनया नायः रिदेन महर्जनं नेवाः देय् दबू, हलि नेवाः गुथि, ज्यापू महागुथि लगायतका फुक्क नेवाः संघ, संस्था लगायत थीथी संघसंस्थायात विशेष इनाप याःगु दु ।