बिराट गुथिं जगतसुन्दर मल्लया झ्वाताँय् स्वांमाः क्वखायेकेज्या जुल

कृष्ण प्रजापति
बिराट नेपालभाषा साहित्य सम्मेलन गुथिया ग्वसालय् कउलागा त्रयोदशि बुधवाःकुन्हु खौमाय् च्वंगु मास्टर जगतसुन्दर मल्लया झ्वाताँय् स्वांमाः क्वखायेकेगु ज्या जुल । बिराटया नायः महेन्द्रगोपाल कर्माचार्यया सभापतित्वय् न्ह्यःगु स्वामाः क्वखायेके ज्याझ्वलय् बिराट नेपालभाषा साहित्य सम्मेलन गुथिया पुलांम्ह नायः व सल्लाहकार त्रिरत्न शाक्यं अन्तर्राष्टिय स्तरय् तकं थीथी सम्मान व पदकं विभूषित जुयादीम्ह अमर ब्यक्तित्व जगतसुन्दर मल्ल छम्ह राणा कालया तसकं स्यल्लाम्ह भाषिक न्ह्यलुवा खः धयादिल । वय्कलं जगतसुन्दर मल्ल नेवाः न्ह्यलुवा ब्यक्तित्व जक मखुसें संसारया थीथी लागाय् वना नं थःगु भाषा, जाति व संस्कृतिया प्रचार याना च्वनादीम्ह ब्यक्तित्व जूगु कनादिल ।
ज्याझ्वलय् बिराटया मेम्ह सल्लाहकार नरेन्द्रभक्त हाडां थःपिंलिसें ताः ई न्ह्यः हे जगतसुन्दर मल्ललिसेंया स्वापू दुगु पुलांखँ कुलादिल । नेपाल साहित्य मन्दिरया नायः तिलक प्रकाश कायस्थं नं थःगु नुगः खँ कनादीगु उगु स्वांमाः क्वखायेकेगु ज्याझ्वलय् मिसा प्रतिभा राज्यश्वरी शिल्पकारं नं थःगु नुगः खँ तयादीगु खः । ज्याझ्वः पुष्प तिमिलां न्ह्याकादीगु खः । थ्वहे झ्वलय् न्हूदँया लसताय् नेपालभाषा साहित्य तःमुँज्यां नं सुजःद्यः मरः त्वालं सांस्कृतिक जुलुस यानाः खौमा त्वालय् थ्यंकाः मास्टर जगतसुन्दर मल्लया झ्वाताँय् स्वांमाः क्वखायेकीगु ज्याझ्वः दु ।
उगु ज्याझ्वः कुन्हु हे विविध भाषा साहित्य समाजया ग्वसालय् मध्यपुर थिमिया बोडे नं सुथय् भिन्तुना जुलुस व न्हिनय् नीस्वक्वःगु विविधभाषा साहित्य सम्मेलन यायेत्यंगु दु । उगु ज्याझ्वः नेपाल मजदुर किसान पार्टीया केन्द्रीय अध्यक्ष नारायणमान बिजुक्छेँ रोहितया मूपाहासुइ यायेगु ग्वसाखलकं जानकारी ब्यूगु दु ।