ख्वपय् मनू तनीगु प्रबृत्ति अप्वयाच्वंगु प्रहरीया धारणा

कृष्ण प्रजापति
ख्वपय् मनू तनीगु प्रबृत्ति अप्वयाच्वंगु खँ महानगरीय प्रहरी परिसरं धाःगु दु । थौं परिसरय् जूगु पत्रकार सम्मेलनय् एसपी शिवकुमार श्रेष्ठं ख्वपं ज्याथ जिथि, मस्त व ल्यासे ल्याय्म्हत तकं तनीगु प्रबृत्ति अप्वयाच्वंगु खँ कनादिल । गुलिं मानसिक स्थिति पाय्छि मजुया, गुलिं बेरोजगारया कारणं व गुलिं अपराध यानाः नं मस्त व मिस्त थीथी कारणं तनाच्वंगु व उमित पोखरा, भैरहवा थेंक वना नं लुइकेगु ज्या जुयाच्वंगु पत्रकार सम्मेलनय् जानकारी बिउगु खः । वंगु दँ जक बनमाला जातीया ज्याथम्ह तंगु आः तकं तनं तुं जुयाच्वंगु दनि ।
    अथेहे पत्रकार सम्मेलनय् महानगरीय प्रहरी प्रभाग प्रमुख एसपी शिव कुमार श्रेष्ठं थुगुसी झिंच्यागु जू म्हितूगु घटनाय् १६२ म्हेसित ज्वनागु कन । थुगुसी ६६० गू अपराधया घटना जूगु, तुलनात्मक रुपं अपराधया ल्याः धाःसा म्हो जूगु तर अपराध पूर्ण रुपं पने धाःसा मफइगु स्वीकार यानादिल । लागू औषध दुब्र्यसनी संसारया हे समस्या जूगु तर ख्वपय् म्हो जुजुं वंगु नं कनादिल । नापं ठगी, यौन हिंसा, सवारी दुर्घटना, खुँज्या, जू म्हितेगु थें ज्याःगु अपराध व दुर्घटना म्हो यायेगु लागिं प्रहरी याकःचिया कुतलं सम्भव मजूगु नं उगु पत्रकार सम्मेलनय् सार्वजनिक रुपं न्ववानादीगु खः ।