न्हूदँ ११४२ या लसताय् घोषक संकिपाया प्रचारात्मक भिंतुना ज्याझ्वः

कृष्ण प्रजापति
नेपाल सम्बत कथं न्हूदँ ११४२ न्ह्यःने वःलिसे न्हूदँया लसताय् थीथी ज्याझ्वः जुयाः वयाच्वंगु दुसा थ्वहे झ्वलय् चिराग फिल्मसया ब्यानरय् निर्माण जूगु ऐतिहासिक बुद्धकालीन नेपालभाषाया संकिपा घोषक पाखें  नं न्हूदँ ११४२ या लसताय् भिंतुना कालबिल ज्याझ्वः व तुच्चा ज्याझ्वः याःगु दु । येँया विशाल बजारय् च्वंगु बेन्टो लाउन्ज एण्ड बारय् वंगु शनिवाः जुउगु उगु ज्याझ्वः संकिपाया निर्माता रोशन बज्राचार्यया सभापतित्वय् जुउगु खः । थथे छगू औपचारिक ज्याझ्वः याना भिंतुना कालबिल याःगु ज्याझ्वलय् थीथी संघसंस्थाया प्रतिनिधिपिनिगु उपस्थिति दुगु खः ।
    भिक्षु महास्थविर तपस्वी भन्तेया मूपाहाँसुइ जूगु ज्याझ्वलय् ईलोहं प्रकाशनया प्रबन्ध निर्देशक नरेशवीर शाक्यं घोषक संकिपा नेपालभाषाया संकिपा जुगु व बुद्ध दर्शन दुगु कारण झीसं थुगु संकिपा स्वये हे माः धकाः बिचाः प्वंकादीगु खःसा थःम्हं हे संकिपा वा छुं नं बिषय मस्वयेकं मेपिंसं धाःगु खँयात पत्याः यानाच्वने मज्यू धकाः बुद्ध शिक्षा नं लुमंका ब्यूगु खः । ज्याझ्वलय् बज्राचार्य समन्वय परिषदया नायः अनाररत्न बज्राचार्यं बुद्धधर्मया प्रचारया हेतु घोषक संकिपाया कुतः तसकं हे च्वछायेबहःजू धकाः तारिफ यानादीगु खः । ज्याझ्वलय् शाक्य समाजपाखें डा. लक्ष्मण शाक्य, परम्परागत बौद्धधर्म संघपाखें दयानन्द शाक्य, ज्ञानमाला भजनपाखें पुर्णकाजी ज्यापू, बज्राचार्य क्लबपाखें ज्योति बज्राचार्य, वरिष्ठ सिने पत्रकार बिजयरत्न असंबरेपिन्सं थःथःगु खँ तयादीगु खःसा ज्याझ्वःया मूपाहां तपश्वी भन्तेपाखें नं नुगः खँ तयाः बिज्याःगु खः ।
    ज्याझ्वलय् वरिष्ठ कलाकार एवं घोषक प्याखँया प्रतिनिधित्व याना राजेन्द्रमान शाक्यं लसकुस यानादीगु खःसा संकिपाया निर्देशक अमृतचन्द्र श्रेष्ठं नेपालभाषाय्  संकिपा दयेकेगु धैगु फिइ लः तयेगु सरह धकाः बय् बय् यानातःगु खँ सत्य मखु । थःपिंसं मेहेनत याना वन धाःसा लगानी लिसें लवः नं काये फइ धकाः खँ तयादिल । पाहांपिं सकसितं प्याखँया मेम्ह निर्माता प्रेमा शाक्यं लसकुस यानाः खादा न्ययेकादीगु खः । घोषकया प्रिमियर असोजया ९ गते जूगु खःसा संकिपा मेगु शो वइगु कार्तिक २७ गते अष्टनारायण हल, बालाजुइ जुइत्यंगु दु ।