कृष्ण प्रजापति
असत्य न्हंकाः सत्यया विजय जूगु प्रतीक कथं मोहनि नखः हनेगु सुरु जूगु धारणा दु । संसारय् असत्यया दबदबा चले जुजुं वनेवं त्रेता युगय् कृष्ण, द्धापर युगय् राम नापं थीथी युगय् थीथी सहासी पुरुषया जन्म जूगु धार्मिक विश्वास दु । आः धाःसा असत्यं थाय् कयाच्वंगु कयां तुं जुयाच्वंगु दु । विश्वन्यंकं पूँजीवादया उदय व समाजवादया रक्षात्मक स्थिति लानाच्वंगु थ्व इलय् नेपालय् नक्कली कम्युनिष्ट व सक्कली पूँजीपतितय् राज चले जुजुं वनाच्वंगु थ्व इलय् मोहनि नखः हनाः जूसां असत्ययात सत्यं त्याकी ला धइगु मनसुवा तयेमाःगु अवस्था वःगु दु । असत्ययात सत्यं त्याके फइ धइगु उखान चले जूसां विना संघर्ष, आन्दोलन व चेतनाया अभावं असत्य क्षणिक रुपं जूसां झल्लमल्ल थिनाच्वंगु दु । थ्व अस्थायी खः धइगु इमिसं नं स्यू, तर थः मन्त कि यत्थें थजू धइगु ल्याखं ज्या यानाच्वंगु दु ।
    
नेपाली राजनीतिक इतिहास स्वस्वं वनेगु इलय् थन इलय् ब्यलय् राणा शासक, पंचायती शासक व पूँजीवादी शासकतय्सं शासन ब्यवस्था सञ्चालन यानाः देय्यात खाली शोषण जक यानाच्वंगु खनेदु । थनया धन सम्पत्ति, सम्पदा व प्राकृतिक श्रोत साधनयात उचित रुपं छ्यला उत्पादन व राहत बियेगु ज्या जुयाच्वंगु मदु । खाली शासक जुयाः जनतायात शोषण यायेगु ज्या छता धाःसा थन न्ह्याम्ह मनू शासन सत्ताय् थ्यंका पूवंकूगु दु । जनताया सेवक जुइमाःपिं जनप्रतिनिधितय्सं तकं शोषण यानाः थः अप्वः सत्ताय् टिके जुयाच्वनेगु काइदा स्वयाच्वंगु दु । उकिं नं थन जनतां राहत मखु आहात फये मालाच्वंगु दु । भेदभाव व अन्याय सह यानाः सदां दुःखी जीवन हनेत जनता बाध्य जुयाच्वंगु दु । उकिं दछिया छक्वः वइगु थ्व मोहनि नखं जूसां नेपाली जनतां विजय प्राप्त जुइला वा असत्ययात क्वत्यला सत्यं थाय् काये फइगु खःला धकाः आशा यानाच्वंगु दु ।
    
कवि, कलाकार, पत्रकार व साहित्यकारतय्सं थःगु च्वसा मार्फत् सारा जनतायात चेतना ब्वलंकाः देय् व जनताया लागिं छुं सेवा यायेगु भावनां हे पत्रपत्रिका पिथनीगु खः । तर थन ब्यावसायिक पत्रकारिताया नामय् अप्वः स्वयां अप्वः लब नयेगु ताः तयाः जनताया भावना अःखः वा जनताया स्वयां सरकार व सत्ताया गौरव थकायेगु ज्यात गुलिं पत्रिकातय्सं याना वयाच्वंगु दुु । नाफामुखी पत्रकारिताया कारणं सत्य, निष्पक्ष व स्वतन्त्र पत्रकारिताया नारा ध्याकुनय् लानाच्वंगु दु । छु खँ जनतायात थुइकेगु, छु विषययात यदि च्वन्ह्याके फत धाःसा जनतां याकनं प्रगति यायेफइ धइगु स्वयां ब्यवसाय वा नाफाया धारणां पत्रिका पिकायेगु ज्या झीगु देसय् म्हो इलय् याकनं हे विकास जूगु दु । थुकिं यानाः सत्य खँ च्वइपिं, सही दिसाय् वनाच्वंपिं गुलिं पत्रकारत बिस्थापित जूवनाच्वंगु दु । देय्या कला, संस्कृति व सभ्यताया बारे म्हो जक पत्रपत्रिकाय् खँ पिहां वइ । न्हिया न्हिथंया राजनीति व दल बदल थेंज्याःगु विषयं सदां अग्र समाचारया थाय् दयाच्वनी ।
    
जनताया सेवा यायेगु ल्याखं पत्र पत्रिका चले यायेमाःगु खः । जनतां थुइगु भासं सरल ढंगं च्वया साहित्यकारतय्सं थःपिनि च्वसु व साहित्य जनतायात पित बिइमाःगु खः । तर गुलिं साहित्यकार धाःपिसं मथूगु मस्यूगु व अलमल जुइगु खँत च्वयाः बौद्धिक समूहयात छझाः मन सालेवं थः तःधंम्ह कवि साहित्यकार जुइगु ल्याखं डिष्नेरी पुइका न्हूगु खँग्वः माला न्हूगु शब्द लुइकाः थःम्हेसियां तकं मसिउगु खँग्वः छ्यलाः तकं साहित्य व रचना च्वयेगु याना सिरपाःया दाबी यानाच्वनी । मोहनि नखः न्ह्यःने वयाच्वंगु थ्व इलय् ख्वपय् साहित्यया थप चहपह सुरु जूगु दु । मोहनियात खाली नयेगु, त्वनेगु व पुनेगुलि जक सीमित मयासें छुं भचा जूसां साहित्यिक गतिविधि मार्फत् जनचेतना ब्वलंकेगु ताः तयाः ख्वीदँ न्ह्यः पंचायती शासन ब्यवस्था सुरुवात जूगुयां लिपांगु दँ २०१८ सालय् नीस्वंगु बिराट गुथि व नेपालभाषा साहित्य तःमुँज्यां थःपिनि साहित्यिक गतिविधियात निरन्तरता बियाच्वंगु दु । थ्वहे इलय् पत्रिका पिथनेगुया उद्देश्य व साहित्य व कला प्रवद्र्धनया मू ताः छु खः व उकिं जनतायात गुकथं ग्वाहालि जुइ धइगु बहस न्ह्यानाच्वंगु दु ।
    
समसामयिक राजनीतिक विषययात कयाः साहित्य सिर्जना यायेगु ज्या ताः ई न्ह्यःनिसें नेपालभाषा साहित्य तःमुँज्याया दबलीं जुयाच्वंगु दु । अथेहे बागु सदी स्वयां अप्वः न्ह्यःनिसें जातीय स्वतन्त्रतायात क्वत्यला राष्टया उत्थान जुइ फइमखु धइगु नारा ज्वना बिराट गुथि न्ह्यःने वयाच्वंगु दु । मोहनि जःखः ख्वपय् न्ह्याइगु थ्व निगू तःजिगु साहित्यिक गतिविधिपाखें आः तकं देसय् प्रतिनिधित्व याइपिं साहित्यकार व कवि कलाकारतय्गु जन्म जूगु दु धायेबलय् ख्वपया गौरव गुलि च्वन्ह्याः । येँ व यलया साहित्यकारतय्सं तकं थःपिं बिराटपाखें कवि साहित्यकारया धलकय् दुथ्याःपिं खः धायेत मछाः मजूसें गौरव साथ धाइबलय् व तःमुँज्याय् वनाः जिं द्धलंद्धः मनूतय् न्ह्यःने कविता ब्वने नं, नाटक क्यने नं साहित्य बारे चर्चा परिचर्चा यानाः भाषण याये नं धकाः पिने कनीगु इलय् मोहनि नखःय झ्वलय् ख्वपमितय्सं सिर्जनात्मक अभियान न्ह्याकाच्वंगु ज्या गुलि पायछि जू धइगु नं सीदु ।
    
यःसां मयःसां झी राजनीतिक प्राणी खः । राजनीतिक ब्यवस्थायात माने मयासें झी सामाजिक प्राणी जुइ फइमखु । उकिं सामाजिक प्राणी व सामाजिक कार्यकर्ता जुयेगु निंतिं नं चेतना स्तर थकाये माःगु बाध्यता जुइ । उकिं साहित्य व कला मार्फत् समाजय् थःगु प्रभाव लाकेत न्ह्याम्हं मनू लालायित जुयाच्वनीगु खः । थुकि आधुनिक विद्युतीय माध्यमं थप ग्वाहालि यानाच्वंगु दु । रेडियो, टेलिभिजन मार्फत् साहित्यया थीथी पक्षयात उजागर यायेगु ज्या जुयाच्वंगु दु । चेतनामुलक नाटक, टेलि श्रृंखला नापं थीथी पक्षं सञ्चारया ज्या यानाच्वंगु दु । उकिं नं दबू दयेकाः तःमुँज्या यासां वा क्वथा दुने बिराट साहित्य सम्मेलन न्ह्याकूसां टेलिभिजन मार्फत् वा फेसबूक पेज मार्फत् संसार न्यंकं प्रत्यक्ष स्वये दइगु ब्यवस्था छगू धाःसा न्ह्याब्लें त्वः मफिकुसें यायेगु चलन सुरु जूगु दु । उपलब्ध श्रोत साधनयात छ्यलाः जन जीवनयात सेवा यायेगु ज्या साहित्य व कला मार्फत् जुइमाः । म्हिगः तक छुं छगू पुचःया जक दबू जुयाच्वंगु साहित्यिक दबूयात स्वनिगः व स्वनिगः स्वयां पिनेयापिंत तकं थाय् बिया वनेगु ज्या जूगु छगू बांलाःगु पक्ष हे खः । थ्व नं मोहनिया लसताय् असत्ययात सत्यं त्यकूगु काइदा धााःसां पाइमखु ।...

All Comments.......


Please Login/Register To Comments