नेवाः आन्दोलनया न्ह्यलुवाः लक्ष्मीदास मानन्धरया हनेज्याझ्वः

कृष्ण प्रजापति
नेपाल संवत आन्दोलनया न्ह्यलुवा, भाषासेवी, समाजसेवी व उद्याोगपति  भाजु लक्ष्मीदास मानन्धरया हनेज्याझ्वः जूगु दु ।
नेपाल संवत न्हूदँ राष्ट्रिय समारोह समिति ११४१ या ग्वसालय् थौं यँलागा अमाइ (असोज २०) गते बुधवाः जूगु लक्ष्मीदास मानन्धर हना ज्याझ्वलय् नेपाल संवत न्हूदँ राष्ट्रिय समारोह समिति ११४१ या नायः रमेश महर्जनया सभानायःसुइ न्ह्याःगु उगु ज्याझ्वलय् नेवाः देय् दबूया नरेश ताम्राकार पुलांम्ह स्वास्थ्य राज्यमन्त्रीलिसें समाजसेवी तीर्थराम डंगोलपिं पाहाँ कथं उपस्थिति जुयादीगु खः । ज्याझ्वलय् जातीय लिसें भाषिक आन्दोलनया न्ह्यलुवाःपिनिगु उपस्थिति दूगु खः । ज्याझ्वः उमेश स्थापितं न्ह्याकादीगु खः । येँया क्षेत्रपातिइ जूगु उगु हना ज्याझ्वः लिपाः भाषासेवी, समाजसेवी, उद्योगपति नेपाल संवत् आन्दोलनया न्ह्यलुवाः लक्ष्मीदास मानन्धरं नुगःखँ तयादीगु खः ।
नेपाःया मौलिक संवत् राष्टिय संवत नेपाल संवत्यात सरकारपाखें मान्यता बिइकेगु नितिं थ्यंमथ्यं प्यंगू दशक न्ह्यःनिसें निरन्तर संघर्ष यानाः वयाच्वंंपिं हनेबहःपिन्त जिं थौं लुुमंका च्वना । नेपाल संवत आन्दोलनया न्ह्यलुवाः पद्मरत्न तुलाधरयात थौं जिं लुमंका च्वना । वय्कःलिसें जनकवि दुर्गालाल श्रेष्ठ, मल्ल के. सुन्दरपिन्सं नेपाःया मौलिक संवत् नेपाल संवत्यात सरकारं मान्यता बिइ हे माः धकाः न्ह्याकूगु थुगु आन्दोलन हलिमय् हे विस्कं कथंया आन्दोलन खः । थ्व आन्दोलनया निरन्तरतां नेपाल संवतयात नेपाल सरकारं नेपाःया संवत धकाः मान्यता ब्यूसां सरकारपाखें थ्व संवतया सम्मान कथं गनं नं छ्यलाबुला याःगु मदु ।
    नेपाल संवत नेपाःया संवत खः धकाः धायेधुंकाः थ्व संवतयात व्यवहारय् छ्यलेमाः । झीगु आन्दोलनया मू माग नं थ्वहे खः । थुगु आन्दोलनय् छगू पुस्तां थःपिन्त पानाः वनेधुंकूगु दु । व थौं थ्व आन्दोलनयात अझ नं माःकथंया निर्देशन बियाच्वंगु दु । ई आः, थ्व आन्दोलन न्ह्याकेगु नितिं न्हूपुस्तायात न्ह्यःने यंकेमाःगु, थुइकेमाःगु आवश्यकता झीगु न्ह्यःने थ्यनेधुंकूगु दु । थ्वहे खँयात वाःचायेकाः थुगु आन्दोलनय् आवद्ध सकलसिनं नेपाल संवतया आन्दोलनयात न्हूपुस्ता तक थ्यंकेगु नितिं माःकथंया कुतः याइ धैगु भलसा कयाच्वना । जिं थःपिन्सं यायेफूगु कथं थुगुु आन्दोलनय् छम्ह कार्यकर्ता कथं जक ज्या यानाच्वनागु खः । न्हूपुस्तायात हःपाः बिइगु ज्या निरन्तर रुपं थ्यंमथ्यं छगू दशक न्ह्यःनिसें यानाः वयाच्वनागु दुसा थ्वयां न्ह्यः हनेबहःम्ह भाजु पद्मरत्न तुलाधरया नेतृत्वय् ज्या यानाः वयाच्वनागु खः । वय्कःया हे नेतृत्वय् समारोह समितिइ नायः जुयाः नं ज्या याना ।
    थ्व लुमन्ति जक जिगु जीवनय् मखुसे, थथे नायः जुयाः ज्या यानागु हःपाःपाखें थौंतक नं थ्व आन्दोलनय् थःत पायेफूगु  खः । थौं, ने.सं. ११४१ न्हूदँ समारोह समितिया नायः, दुजःपिन्सं जिं याःगु ज्यायात लुमंकाः जितः हनादिल । थुकिया नितिं सकलसितं दुनुगलंनिसें सुभाय् देछाना । जि थौं नं छिकपिं लिसे हे दु । थुगु आन्दोलनय् भौतिक रुपं जिगु उपस्थिति म्हो जूसां नं विचाःया ल्याखं जि सदां छिकपिनि नापं दु । व सरकारं गुबलेतक नेपाल संवतयात व्यवहारय् छ्यलीमखु, उबले तक थ्व आन्दोलनय् जि दया तुं च्वनी ।