कृष्ण प्रजापति
सहश्राब्दी चुनौती परियोजना मिनिलियम च्यालेन्ज कर्पोरेशन विरुद्ध न्ह्यानाच्वंगु संघर्षं देशब्यापी रुप काःगु दु । छगू इलय् अमेरिकी दूतावास, भारतीय राजदूतावास व सिंहदरवार लिसें संसद भवन न्ह्यःने सीमित थ्व आन्दोलनं आ बृहत्त रुप कया वनाच्वंगु दु । पूर्वी नेपालया इलाम, झापा, पाँचथर वा ताप्लेजुंगय् थजू वा पश्चिमी नेपाःया बैतडीइ एमसीसीया विरुद्ध सः मथ्वःगु थाय् आः मदये धुंकल । राजधानीइ केन्द्रीत थ्व आन्दोलनं आः पूर्व मेचीनिसे पश्चिम महाकाली तकं दने धुंकूगु दु । थुकिया लिउने देसय् अराजकतावादी शक्तिं एमसीसी पास याकाः देशयात बरबाद यायेत्यंगुलिं खः । थःगु स्वार्थ सिद्ध जुइगु जुल धाःसा थःगु छेँयात हे झौं यानाः नौ यानाः उकिया राप पनीपिं झी राजनीतिक नेतातय् कारणं थ्व आन्दोलन देशब्यापी जुजुं वनाच्वंगु दु । स्वार्थी तत्वतय्सं विदेशीं बिइत्यंगु दांया लोभं न्हापा हे सम्झौता याना तये धुंकूगु चीजयात सदनया दुईतिहाई बहुमतं पारित याये माःगु कारणं थ्व इलय् सत्ताधारी व प्रतिपक्षी दलतय् दथुइ प्रतिश्पर्धा दु ।
    वास्तवय् एमसीसी विरुद्ध सः मथ्वयेकीपिं सत्ताधारी दल एमाले, माओवादी, नेपाली कांग्रेस वा जनता समाजवादी पार्टीयात थौं गुकथं झीसं राष्टियता प्रति सजग व सचेत पार्टी धायेगु ? थःगु देय्यात कतःया देसं धाःथें तयेगु झीगु संस्कारय् मदु । बाह्रौं शताब्दीया इलय् जुजु भीमदेवं थन शासन यानाच्वंगु इलय् तकं तिब्यत चीनं नेपाःया सच्छिम्ह कलाकार नापं कालिगढत माग जूगु इलय् नेपालं चय्म्ह जक थनं छ्वयाः थःगु पह क्यंगु दु । अथे धइगु झीगु पूर्खां चीनं धाःथें वा तिब्यति जुजुपिसं इनाप याना हःथें धाक्वः कलाकार व कालिगढत अन मछ्वः । थःगु नीति दयेकाः थःगु हे पह क्यने कथं अन चय्म्ह कालिगढत अरनिकोया नेतृत्वय् उखे छ्वत । तर थौं सत्ताशीन नेतातय् मानसिकता थुलि क्वह्यनाच्वंगु दु कि अमेरिकां छु गथे धाल अथे पालना यानाः नतमस्तक जुइत स्वयाच्वंगु दु । जःलाखःला देय् भारत व अमेरिकी सम्राज्यवादी शक्तिया न्ह्यःने त्वम् शरणमया काइदा क्यनेत स्वयाच्वंगु दु । उमित वइगु छुं दां वा कमिशनयात ध्यानय् तयाः ५०० करोड अमेरिकी डलरयात महत्व बियाच्वंगु दु । बरु थन जुइगु गुलिं भ्रष्टाचारयात पने फत धाःसा उगु दां ला थनं चूलाके फइगु खः ।
    देय् न्यंकंया युवा शक्ति थौं एमसीसीया विरुद्ध आन्दोलित जुयाच्वंगु दु । उकिया मू कारण धइगु पाका नेतातय्सं उकियात दुनं दुनं पारित याकाः थौं देय् खोक्रो याइगु सम्भावना दुगुलिं खः । राष्टघाती महाकाली सन्धीं आजित झी नेपाःमि जनता हाकनं छक्वः एमाले कांग्रेसं हःगु नीति खनाः तसकं ग्यायेमाःगु अवस्था दु । पूँजीवादी शासकतय्सं थःपिंत फाइदा जुइगु जुल धाःसा थः मां नापं मीयः धइगु खँ थन प्रमाणित जूवंगु दु । राणातय्सं बरु देय् बचे यायेत स्वत । पंचतय्सं राष्टियाताया नारा थ्वयेकाः बरु देय् संयुक्त राष्ट संघय् दर्ता याना विदेशी हस्तक्षेपपाखें बचे यायेगुलि बः बिल । तर जब गणतन्त्र व प्रजातन्त्र धाःगु शासन पद्धतिया विकास जुल । अनंनिसें मोदी वयाः सदनय् भाषण याना जूसां नेपाःया सार्वभौमसत्तायात हाथ्या बीगु ज्या जूगु दु । थनया जनतायात भारतं धाःथें तयेत तयार दु धाःसां झी सांसदतय्सं सदनय् मिखा तिसिना ल्हाःपाः धायेगु ज्या यानाच्वंगु दु ।

माय्न पावर कम्पनी चायेका नेपाली ल्याय्म्हतय्त विदेसय् दास याके छ्वयेगु, कृषि सामग्री इलय् हयेगु मयासें नेपाली उन्नतिशील भूमि बाँझो तयेगु ज्या पूँजीवादी शासकतय्सं ताः ई न्ह्यःनिसें यानाच्वंगु दु । उकिं नं थनया आर्थिक स्थिति दाँवादोल जूवनाच्वंगु खः । थःगु हे थासये मेहनत याना विदेशीया भर मकाःसें ज्या यायेगु खःसा थ्व देस याकनं स्वर्ग जुइगु खँय् निगू मत दइमखु । तर थन ला दास मानसिकतां ज्या याके बियाच्वंगु दु । शिक्षा नीति गलत जुयाच्वंगु दु । आखः ब्वनाः छुं भचा शिक्षित जुल वा डिग्री हासिल जुल धायेवं बुँज्या याये मजिउगु गलत मानसिकतां थाय् कयाच्वंगु दु । चीनय् स्वसाः एम. ए. वा पीएचडी यानाच्वंपिं मनूत कृषि पेशाय् निर्धक्क लगे जुयाः कार गयाच्वंगु दु । न्हापा साइकल तकं गयेत थाकुपिं मनूत वा कृषकत अन थौंकन्हय् कार गयाः बुँइ जुइगु जुयाच्वंगु दु । आत्मनिर्भर जुयेगु नीतिं थुलि याकनं चीन विकास जूगु खः । अन ७० दँ दुने जनवादी शासन पद्धतिं याःगु विकासयात विश्वं सराहना यानाच्वंगु दु ।

झीसं न्ह्याब्लें भिंगु व खःगु ज्यायागु अनुकरण यायेमाःगु खः । थौं जःलाखःला देय् चीनं यानाच्वंगु कृषि क्रान्तियात थनया पूँजीवादी नेतातय्सं मिखा तिसिना मखंछुं च्वनाच्वंगु दु । अनं वःगु वापुसा छ्यलाः न्हापा न्हापा न्यामुरी सइगु थासय् आः रोपनीं झिमुरी तकं वा सइगु सीकं सीकं थ्व पद्धति व सहुलियत दरं कृषि सामग्री इनेगु ज्यायात निरन्तरता बियाच्वंगु मदुनि । बरु विदेसं थन जाकी न्याना जनताया प्वाः थनेगु याना कमिशन नयाच्वंगु दु । थ्व नं छगू ल्याखं भ्रष्टाचार खः । अथे याये म्वायेकेगु निंतिं एमसीसी थेंज्याःगु परियोजनाया विरोध यायेमाःगु खः । नीतिगत भ्रष्टाचार जुयाच्वंगु थासय् सचेत नागरिकं सः थ्वयेके फयेकेमाः । मखुत धाःसा थन भ्रष्टाचार झन् झन् तच्वः जुयावनी । भ्रष्टाचारयात पने फत धाःसा ५०० करोड अमेरिकी डलर ५५ अरब नेपाली दां झीगु निंतिं तःधंगु खँ मखु । थनया मेहनतं कमे याना नं झीसं थःगु बजेटय् उलि दां थप यायेफु ।

हिन्द प्रशान्त रणनीति अन्तर्गतया सैन्य गठबन्धनया पातो कथं वःगु थ्व एमसीसी परियोजना अमेरिकी सेना नेपालय् दुत हयेगु छगू त्वह खः । थ्व तत्वं विश्वयात ध्वस्त यायेधुंकूगु दु । श्रीलंकां उकिं एमसीसीयात बहिस्कार यात । थौं नेपालं मिखा कां जुया हाकनं एमसीसी परियोजनाय् सही यानाः उकियात सदनं पारित याकेगु काइदा स्वयाच्वंगु धइगु झीसं थःगु तुतिइ थःम्हेसियां पां पालेगु ज्याथें खः । उमित थन दुकयाः जितः शासन याः धकाः थःत स्याकेत थःगु तरवार थः सत्रुयात लः ल्हायेगु ज्या थें खः । सचेत नागरिकतय्सं एमसीसीया विरुद्ध देशब्यापी रुपं सः थ्वयेकाच्वंगु इलय् पुलांपिं पंच, जुजुवादी शक्तिं लोकतान्त्रिक नेतातय् कमजोरीया अवसरय् फाइदा कायेगु कुतः यानाच्वंगु दु । उकिं एमसीसी विरुद्ध न्ह्यानाच्वंगु संघर्षयात निरन्तरता बिइमाःगु खनेदु ।
...

All Comments.......


Please Login/Register To Comments