प्रहरीं वीरगञ्जपाखें मुस्कान खातुनयात एसिड प्रहार याःम्ह मिजंयात हाकनं गिरफ्तार याःगु दु
असोज १४, २०७८, बिहीबार | विहान ११:४५ बजे | 35
रौतहट साविक नरकटिया गाविस २ परिवर्तिन पहोरा गाउँपालिका ७ छेँ जुयाः आः बसाइँसराइ यानाः वीरगञ्ज २ छपकैया च्वनीम्ह १९ दँया (तत्काल १७ दँ)या समशाद मियाँयात गिरफ्तार याःगु खः । मियाँ वि.सं. २०७६ भाद्र २० गते सुथय् ६ः२० ता इलय् वीरगञ्ज ४ गणेशमान चोकय् च्वंगु सार्वजनिक सतकय् १५ दँया मुस्कान खातुनयात एसिड प्रहार याःगु खः । घटना जुइखतं गिरफ्तारीइ लाःम्ह मियाँविरुद्ध ज्यान कायेगु उद्योग व तेजाब प्रहार यानाः ख्वाः कुरुप यायेगु सम्बन्धी कसूरय् अनुसन्धान व अभियोजन जुयाः सम्मानित पर्सा जिल्ला अदालतया आदेशं तत्काल पूर्पक्षया नितिं बालसुधार गृह छ्वःगु खः ।
कोभिड १९ या न्हापांगु लहरया प्रकोपया २०७६ चैत्र ११ गते अदालतया हे आदेश कथं चैत्र १२ गते निजया संरक्षकया जिम्मा ब्यूगु खः । चैत्र २६ गते अदालतं ल्यंदूगु कैद ५ महिना १६ दिं हाकनं बालसुधार गृहय् तयाः भुक्तान यायेगु कथं दच्छि कैद सजाय क्वःछ्यूगु खः । तर फैसला कार्यान्वयन यायेगु झ्वलय् मियाँ फरार जूगु खः । मियाँयात बुधवाः वीरगञ्ज २ ईदगाह चोकपाखें नियन्त्रणय् काःगु जिल्ला प्रहरी ज्याकुथि पर्साया प्रवक्ता प्रहरी नायब उपरीक्षक ओमप्रकाश खनालं जानकारी ब्यूगु दु ।
Comments
.jpg)
.png)