च्वलेचा खोरय् चच्छि धुँ ः मोहनीयात लहिनातःपिं ७ म्ह खसिलिसें २१ म्ह चोलेचा स्वाहा !

कृष्ण प्रजापति
बर्दियाया गुलरिया नगरपालिका ५ सन्तोषी त्वालय् व्यवसायिक फर्मय् दुहाँ वनाः धुं २१ म्ह च्वलेचा स्याःगु दु ।
व्यवसायी चन्द्रकान्त पौडेलया फर्मय् आइतवाः बहनी १० ता ईनिसें सोमवाः सुथय् ५ ता ईया दथुइ खोरय् दुहाँ वनाः धुं ७ म्ह खसि, ७ म्ह माउ च्वलेचा व ६ म्ह चीधिकःपिं मचापिं च्वलेचा स्याःगु खः । २१ म्ह मध्ये ७ म्ह खसी मोहनीया इलय् मिइत ठिक्क यानातयागु पौडेलया धापू दु । बस्तीसिबें भच्चा तापाक्क च्वंगु उगु खोरय् जूगु घटनाय् छम्ह चीधिकःम्ह च्वलेचा म्वानाच्वंगु अवस्थाय् लुयावःगु दुसा छम्ह च्वलेचा तनाच्वंगु फर्म संचालक पौडेलं जानकारी ब्यूगु दु । पौडेलं धाःगु दु, ‘बहनी खोरय् कुनाः वनापिं २३ म्ह मध्ये २१ म्ह च्वलेचा सिनाच्वंगु अवस्थाय् लूगु खः, छम्ह धुं यंकूगु जुयाच्वन ।’ छम्ह चीधकःम्ह मचाम्ह च्वलेचा धाःसा खोरं क्वय् कुतुंवःगु हुनिं म्वानाच्वंगु अवस्थाय् लुयावःगु पौडेलं धाःगु दु । खोरय् दुपिंमध्ये छम्ह च्वलेचाया ल्यूनेया भाग नयातःगु व ल्यंदुपिं फुक्कसिगु ककुपाखें हि त्वनातःगु सीदूगु पौडेलं धाःगु दु । बनया कर्मचारीपिनिगु रोहबरय् सीपिं च्वलेचात ल्हाकेत यंकूगु पौडेलं धाःगु दु ।