नेपाल साहित्य मन्दिरया न्याक्वःगु अधिवेशन ः त्रिलोक्यमान बनेपाली नाय

नेपाल साहित्य मन्दिरया न्याक्वःगु अधिवेशन भार्वाचोया तिसा इनय् जुल । महाधिवेशनया उलेज्या यानादिसें कवि डा. योगेन्द्र प्रधानं २००७ सालया क्रान्ति लिपा थीथी कथंया साहित्य व संस्कृतिया लागाय् योगदान यानाच्वंपिं युवा पुस्तां थौं स्वयां ख्वीच्यादँ न्ह्यः ख्वपय् २०१० सालय् नेपाल साहित्य मन्दिर नीस्वने न्ह्यःया परिवेश कनादिल । वय्कलं राजनीतिक उत्प्रेरणा व साहित्य प्रतिया मतिनां ख्वपय् दक्कलय् पुलांगु संस्थाकथं नेपाल साहित्य मन्दिरं ज्या यानाच्वंगु कनादिल ।
ज्याझ्वलय् नेवाः जागरण दबूया नायः ओमचरण अमात्यं नेपालभाषा लागाय् अभिलेखिकरणया अभावं तःतःधंगु सम्पत्तिया क्षति जुयाच्वंगु कनादिसें भाषा, संस्कृतिया अभिलेखीकरण व राजनीतिक सहभागीताय् नेवाः जाति न्ह्यःने लायेमाःगु खँ कनादिल । अधिवेशनया उलेज्या समारोहय् बागमती प्रदेशया सांसद रजनी जोशी, रामशेखर लुमन्ति दबूया नायः गोबिन्दमान श्रेष्ठ, कुतः पिकाकया नयाः विमल ताम्राकारपिसं भिन्तुना न्वचु बियादीगु खः । ज्याझ्वलय् मन्दिरया छ्याञ्जे हरिशरण शर्मा सचिवया प्रतिवेदन व दांभरी भावना कायस्थं दांभरीया ल्याःचाः न्ह्यब्वयादीगु खः ।
नेपाल साहित्य मन्दिरया नायः तिलकप्रकाश कायस्थया सभापतित्वय् जूगु उगु ज्याझ्वलय् भक्तपुर विकास सहयोग संघया पुलांम्ह अध्यक्ष कृष्णलाल प्रधानं ख्वपया पुलांगु परिवेश कनादीगु खः । बिराटया प्रतिनिधि रामगोपाल चौगुथिं राज्यं नेवाः जातियात यानाच्वंगु हेवाय् चवाय्यात सामना याना न्ह्यःने वनेमाःगु खँ कुलादिल । मन्दिरया न्वकु पशुपतिमान पमां लसकुस याना न्ह्याकूगु उगु अधिवेशनं त्रिलोक्यमान बनेपाली (अगिब बनेपाली)या अध्यक्षताय् न्हूगु ज्यासना पुचः नीस्वंगु दु ।