पीछक्वःगु नेपालभाषा साहित्य तःमुँज्या न्हापांखुसि देक्वचाय् जुइगु

कृष्ण प्रजापति
ख्वपय् नेपाल संवत ११०० निसें मदीकं दँय् दसं त्वाः त्वालय् कौलाथ्व द्धादशी व तृयोदशी निन्हुयंकं न्यायेका वयाच्वंगु नेपालभाषा साहित्य तःमुँज्याया पीछक्वःगु तःमुँज्या थुगुसी ख्वपय् न्हापांखुसि देसं क्वँय् देक्वचाय् जुइगु जूगु दु । ख्वप कलेज चायेके धुंकाः न्हापांखुसी अन थुगु अवसर चूलाकूगु खः । थ्वयां न्ह्यः तकं नगरं पिने थुगु मुँज्या जूगु मदुनि । पीछक्वःगु नेपालभाषा साहित्य तःमुँज्या ताःलाकेत स्थानीय साहित्यप्रेमितय् मुँज्यां शिक्षक गणेशराम थुसाया संयोजकतत्वय् पीछम्ह दुजः दुगु पीछक्वःगु नेपालभाषा साहित्य तःमुँज्या ग्वसाखलः नीस्वंगु दु ।
    मुँज्याय् नेमकिपाया सचिव सांसद प्रेम सुवालं देश व जनताया संघर्ष साहित्य मार्फत् ब्वलंकेमाःगु खँय् बः बियादिल । सनिवाः जूगु तःमुँज्याया छगू मुँज्याय् नेमकिपाया नायः नारायणमान बिजुक्छेँ रोहितं स्रष्टातय्सं देय् व जनताया सेवा जुइ कथंया साहित्य सिर्जना यायेमाःगु खँय् बः बियादिल । मुँज्याय् नेपालभाषा साहित्य तःमुँज्याया पुलांम्ह नायः जनकवि चन्द्रबहादुर उलक, युवा कवि दामोदर सुवाल, नेपालभाषा साहित्य तःमुँज्याया नायः आशाकुमार चिकंबंजार लगायतं नेपालभाषा व नेपालभाषा साहित्यया बारे न्हू प्रतिभातय्त बरोबर प्रशिक्षण आवश्यक जूगु खँय् बः बियादीगु खः ।