एमसीसीविरुद्ध थौ देय् न्यंकं राष्ट्रिय जनमोर्चाया प्रदर्शन

कृष्ण प्रजापति
राष्ट्रिय जनमोर्चां एमसीसीविरुद्ध भाद्र २२ गते देय् न्यंकं सांकेतिक विरोध प्रदर्शन याइगु जूगु दु । एमसीसी इन्डोप्यासिफिक रणनीतिया अंग जूगु धासें जनमोर्चां थुकियात छुं नं हालतय् अनुमोदन यायेमज्यूगु धाःगु दु । आइतवाः प्रेस विज्ञप्ति सार्वजनिक यासें जनमोर्चाया नायः चित्रबहादुर केसीं गठबन्धन सरकारं न्यूनतम ज्याझ्वलय् एमसीसी दुमथ्याकूगु जूसां नं छुं दिं थुखेया गतिविधिं एमसीसीयात पारित याकेत चलखेल जुयावःगु धाःगु दु ।
विज्ञप्तिइ धयातःगु दु, ‘एमसीसी वा थुज्वःगु हे गम्भीर प्रकृतिया व विवादास्पद विषयत सरकारं थ्व अवधिइ मल्ह्वनेगु छगू कथंया भद्र सहमति खः । तर छुं दिं थुखे राष्ट्रिय जनमोर्चा बाहेकया गठबन्धनया दलत दथुइ एमसीसीबारे सहलह जूगु, एमसीसीया विज्ञापन प्रसारण जूगु, एमसीए अमेरिकाया न्वकू याकनं नेपाः वइगु, अमेरिकां एमसीसीयात संसदं पारित याकेत ब्यूगु दबाब व चर्चां एमसीसीयात पारित यायेत चलखेल जूगु सहज रुपं अनुमान यायेफु ।’ राष्ट्रिय जनमोर्चां एमसीएया न्वकूया आगमन, नेपाःयात एमसीसी पारित यायेत ब्यूगु दबाबया विरुद्ध व गठबन्धन सरकारयात सचेत यायेत वइगु मंगलवाः भाद्र २२ गते सांकेतिक रुपं देय् न्यंकं विरोधया ज्याझ्वः यायेगु निर्णय जूगु जानकारी ब्यूगु दु । उगु दिं ७७ गू हे जिल्लाय् विरोधसभा, जुलुस, कोणसभा, अन्तरक्रिया, गोष्ठी लिसेंया विरोध ज्याझ्वः जुइगु जनमोर्चां जानकारी ब्यूगु दु ।